شىعىس ازيا قايشىلىعى ءبىر ادامنىڭ ساپارىنا بايلانىپ تۇر

اقش Global Times باسىلىمى اق ءۇيدىڭ 7 ناۋرىزداعى رەسمي مالىمدەمەسى بويىنشا، اقش مەملەكەتتىك حاتشىسى تيللەرسون 15 ناۋرىزدان 19 ناۋرىز كۇنى ارالىعىندا جاپونيا، وڭتۇستىك كورەيا جانە قىتايعا رەسمي ساپارلاي باراتىنىن حابارلادى.  بۇل ونىڭ لاۋازىمدى قىزمەتكە تاعايىندالعاننان بەرى العاش رەت شىعىس-ازياعا ساپارى.  7 ناۋرىزداعى ءباسپاسوز ءماسليحاتىندا، اقش مەملەكەتتىك دەپارتامەنتىنىڭ رەسمي وكىلى داۋنەر اقش مەملەكەتتىك حاتشىسىنىڭ بۇل جولعى ساپارىنىڭ باستى ماقساتى «ساد» جۇيەسىن (Thaad راكەتاعا قارسى جۇيەسى) ورناتۋ ءىسى ەمەس ەكەنىن جەتكىزدى. الايدا، سولتۇستىك كورەيادان كەلەتىن قاۋىپ تۋرالى ءبىر قاتار ماسەلەلەر جونىندە تالقى الىپ باراتىنىن جوققا شىعارمادى. ال، حالىقارالىق Yonhap اقپاراتىنىڭ حابارىنا قاراعاندا، «ساد» جۇيەسى ورناتۋ كەزەڭدەرگە ءبولىپ اتقارىلۋ ۇستىندە.

اقش مەملەكەتتىك دەپارتامەنتىنىڭ مالىمەتىندە، تيللەرسوننىڭ شىعىس ازياداعى ساپارى 15 ناۋرىز توكيودان باستالادى. 17 ناۋرىز وڭتۇستىك كورەياعا باراتىن بولسا، 18 ناۋرىزدى بەيجىڭ ساپارىنا تۋرالاپ وتىر. اتالعان ەلدەردىڭ جوعارى لاۋازىمدىلارى مەن ماڭىزدى مەملەكەتتىك قىزمەتتەگى باسشىلارىمەن كەزدەسىپ، سولتۇستىك كورەيانىڭ يادرولىق جانە زىمىران قاۋىپ-قاتەرلەرى ، سونىمەن قاتار، جاۋاپتاسۋ باعدارلامالارى تۋرالى كەڭەسپەك. ال، دەپارتامەنت وكىلى دانۋەر قىتايدىڭ «ساد» جۇيەسىن ورناتۋعا قارسىلىعى تۋرالى: «ساد» جۇيەسىن ورناتۋداعى بىردەن ءبىر ماقسات، سولتۇستىك كورەيانىڭ سوعىس قاۋپىنەن ساقتانۋ. ءبىز قىتاي تارابىمەن تىكەلەي پىكىرتالاس جانە ديالوگتار الىپ بارۋدامىز. «ساد» جۇيەسىن ورناتۋ ءوزىن-ءوزى قورعاۋ شاراسى بولىپ تابىلادى. ءبىر عانا وڭتۇستىك كورەيا ەمەس، اقش-كورەيا بىرىككەن ارمياسىن قورعاۋ ءۇشىن جاسالعان شارا»، – دەپ ءتۇسىندىردى.

تيللەرسوننىڭ شىعىس ازياداعى ساپارىنىڭ ەڭ ماڭىزدى بولەگى – بەيجىڭ ساپارى. بۇل ترامپ ۇكىمەتىنىڭ الداعى 4 جىل ىشىندەگى اقش-قىتاي قاتىناسىنىڭ رەسمي باستالۋ نۇكتەسى. تيللەرسوننىڭ كومەكشىسى راسسەلدىڭ جاپونيا كيودو اقپاراتتىق ورتالىعىنا بەرگەن سۇحباتىندا، تيللەرسوننىڭ قحر توراعاسى شي جينپينگە (سي تسزينپين ) كەزدەسۋ جوسپارلانىپ وتىرعانىن ايتقان. قازىر، ۋاقىت پەن ەكى ەل باسشىلارىنىڭ جۇمىس كەستەسىن ۇيلەستىرۋ كەلىسسوزدەرى وتكىزىلۋدە.

وڭتۇستىك كورەيا «ورتالىق گازەتى» باسىلىمىندا، 8 ناۋرىز كۇنى،  اقش مەملەكەتتىك حاتشىسىنىڭ ساپارى تۋرالى جان-جاقتى تالداۋ جاسالعان ماقالا جارىق كوردى. وندا اقش-كورەيانىڭ قىتاي قارسىلىعىنا قاراماستان «ساد» جۇيەسىن ورناتۋى ءسوزسىز داۋىل تۋدىراتىن ماسەلە ەكەنى ايتىلعان. بۇل ماسەلەگە قىتايدى كەلىسىم بەرۋگە شاقىرۋدىڭ ءوزى داۋسىز تالاس تۋدىرادى. بۇل تارتىستىڭ اسەرىن ازايتۋ ءۇشىن وڭتۇستىك كورەيا اقش مەملەكەتتىك حاتشىسىمەن كورەيا، جاپونيا، قىتاي ءۇش تاراپتىڭ ورتاق كەزدەسۋىنە ۇيىتقى بولۋى ءتيىس دەگەن كەڭەسىن ايتادى. اتالعان باسىلىمدا: « مويىنداۋ قيىن بولسا دا، قازىرگى جاعدايدان الىپ قارار بولساق، «ساد» جۇيەسىنىڭ اقش-قا قىتايدى السىرەتۋ ءۇشىن كەرەك ەكەنى شىندىق»، – دەپ اشىق ايتىلعان. كورەي اقپارات قۇرالدارىنىڭ حابارىندا، 8 ناۋرىز 16 ساعاتقا دەيىن، قىتايداعى كورەيالىق Lotte Mart 99 ساۋا دۇكەنىنىڭ 55-ءىن جابىلىپ قالعان.

شىعىس ازياداعى ءتورت ەلدى ايتپاعاندا، «ساد» جۇيەسىنە رەسەيدىڭ دە قارسى بولاتىنى بەلگىلى. رەسەي اقپارات قۇرالدارىنىڭ 8 ناۋرىزداعى حابارىندا كرەمل تارابى، وڭتۇستىك كورەيامەن جاساسقان ساۋدا-ارىپتەستىك كەلىسىمدەرىنىڭ ءبىر قاتارىن كۇشىنەن قالدىرۋعا، ءتىپتى باسقا دا اسكەري ەمەس شارالار ارقىلى كورەياعا قىسىم تۇسىرۋگە دايىن ەكەنىن جەتكىزگەن. قالاي دەگەندە دە، اقش مەملەكەتتىك حاتشىسى شىعىس ازياعا ساپارى سول ءوڭىر قايشىلىعىنىڭ ەڭ ءبىر شەشۋشى كەزەڭىندە بولعالى تۇر. تيللەرسوننىڭ شىعىس ازياداعى ساپارى  وڭىردەگى  قايشىلىقتىڭ شەشىم تابۋى مەن ۋشىعۋىنا تىكەلەي اسەر ەتەتىنى داۋسىز.

“The Qazaq Times”