اقوردا «اقيقاتتى» تىركەۋدەن باس تارتتى

اقوردا بيلىگى «اقيقاتتان» قاۋىپتەنە باستادى، – دەپ جازادى ەرمۇرات باپي ءوزىنىڭ فەيسبۋك پاراقشاسىندا.

قر ادىلەت مينيسترلىگى «اقيقات» پارتياسىنىڭ جاڭا اتاۋىن مەملەكەتتىك تىركەۋگە الۋدان باس تارتتى (فوتوكوشىرمەنى قاراڭىز). مينيسترلىكتىڭ كولدەنەڭ تارتقان ءۋاجى – قازاقستاندا «اقيقات» ءسوزىن قولدانعان باسقا ۇيىم – «جەلتوقسان اقيقاتى» دەگەن بىرلەستىك بار ەكەن: «بيزنەس-سايكەستەندىرۋ نومىرلەرىنىڭ ۇلتتىق ءتىزىمىنىڭ مالىمەتتەرىنە سايكەس، «پاتريوتتىق قوزعالىس «جەلتوقسان اقيقاتى» رەسپۋبليكالىق قوعامدىق بىرلەستىگى تىركەلگەن» (قاز-قالپىندا) دەپ، «اقيقات» پارتياسىن تىركەۋگە الماۋدىڭ امال-ايلاسىن جاساپتى.
اقوردانىڭ ايتۋىمەن جاسالعان بۇل جالتارما ارەكەت قازاقستاندىق زاڭدار نورماسىنا قايشى كەلەتىنى بىلاي تۇرسىن، سونىمەن بىرگە فيلولوگيالىق-تىلدىك-لەكسيكالوگيالىق نورمالارعا دا سايكەس كەلمەيدى. قولدانىستاعى «جەلتوقسان اقيقاتى» مەن «اقيقات پارتياسى» دەگەن تىركەستەر ءمان-ماعىنالىق جاعىنان ءبىر-ءبىرىن قايتالامايتىن ۇعىمداردى بىلدىرەتىنىن ءتىل ماماندارى دالەلدەپ، جىكتەپ بەرە الادى دەپ ويلايمىن.
ەكىنشىدەن، ەلدە ءبىر ءسوزدىڭ نەگىزىندە قۇرىلعان ۇيىمدار مەن اتاۋلار از با؟ ءبىر عانا «نۇر» ءسوزىن الايىق: «نۇر وتان پارتياسى»، «نۇر-سۇلتان قالاسى»، «نۇر-استانا مەشىتى»، «نۇر-استانا گازەتى»، «نۇر-استانا مەدرەسەسى»، «نۇر-استانا قۇرىلىس كومپانياسى»... نەمەسە «حابار اگەنتتىگى»، «حابار-24» تۆ-ارناسى»، «دامۋ قورى»، «دامۋ جۋرنالى»، «استانا-دامۋ» دەگەن ءبىر-ءبىرىن قايتالايتىن اتاۋلار ءورىپ ءجۇر.

ەندەشە، بۇل اتاۋلار نەگە «بيزنەس-سايكەستەندىرۋ نومىرلەرىنىڭ ۇلتتىق تىزىمىنە سايكەس» كەلەدى دە، «اقيقات پارتياسى» مەن «جەلتوقسان اقيقاتى» ءبىر-ءبىرىن قايتالايتىن اتاۋلار بولىپ شىعادى؟ «نۇر» تىقپالانباعان تەسىك، جامالماعان جىرتىق قالمادى، ال «اقيقات» اتاۋى نەگە «ۇلتتىق تىزىمگە» سايكەس كەلمەيدى؟
2019 جىلدىڭ 26-ساۋىرىندە وتكەن جسدپ پارتياسىنىڭ سەزىندە قابىلدانعان «اقيقات» اتاۋىن قايتكەندە دە مەملەكەتتىك تىركەۋگە الماۋدىڭ استارىندا ساياسي سيپات بار دەپ ويلايمىن. اقوردا بيلىگى باس كوتەرە باستاعان ەلدەگى جالعىز تاۋەلسىز پارتيانى حالىقتىق قولداۋعا يە بولدىرماۋدىڭ وراشولاق ارەكەتىنە كىرىسە باستادى. ونىڭ باستى ماقساتى – الداعى پارلامەنتتىك سايلاۋدا «اقيقات» اتاۋىن العان پارتيانىڭ ايبىنى باسىم بولماسىن دەگەن مىسىقتىلەۋ.
بىراق ءبىز مينيسترلىكتىڭ مۇنداي ايلا-ارەكەتىمەن كەلىسپەيمىز جانە بۇل شەشىمنىڭ زاڭ اياسىندا دا، تىلدىك-فيلولوگيالىق قولدانىس تۇرعىسىندا دا ەشقانداي لوگيكاعا سايكەس كەلمەيتىنىن دالەلدەپ، سوتقا شاعىم ءتۇسىرۋ پروتسەسىن باستادىق. ءبىز بۇل قارسىلىق ارەكەتكە زاڭگەرلەردى عانا ەمەس، ءتىل ماماندارىن، قۇقىق قورعاۋشى ۇيىمداردى، ەلدەگى شەتەلدىك ديپلوماتيالىق كورپۋس وكىلدەرىن تارتۋدى قولعا الدىق.

فوتو ەرمۇرات باپيدىڭ فەيسبۋك پاراقشاسىنان الىندى.

ەڭ قىزىعى – بۇعان دەيىن بۇيىعى جاتقان پارتيانى ءبىز قالاي وياتامىز، ونىڭ ساياسي-قوعامدىق ماڭىزى مەن ەل-جۇرتقا قاجەتتى جالعىز پارتيا ەكەنىن قالاي دالەلەلدەيمىز دەپ، باس قاتىرىپ جۇرگەنىمىزدە، بىزگە بيلىكتىڭ ءوزى كومەككە كەلدى: ەندى ءبىز جوعارعى سوتقا دەيىن سوزىلاتىن ۇزاق پروتسەستى پيار-تەحنولوگيا رەتىندە پايدالاناتىن بولامىز.

"The Qazaq Times"