گۇلنارا كارىموۆاعا وزبەكستان بيلىگى قىسىم كورسەتۋدە – دەپ مالىمدەدى ونىڭ قورعاۋشىسى گرەگۋار مانجا.

«نەمىس تولقىنى» اقپارات اگەنتتىگىنە بەرگەن سۇحباتىندا مانجا: «وزبەكستان بيلىگى گۇلنارا كارىموۆاعا شۆەيتسارياداعى دۇنيە-مۇلكى مەن زاڭدى قۇقىقتارىنان باس تارتتىرۋ ءۇشىن پسيحولوگيالىق جانە فيزيكالىق قىسىم كورسەتۋدە» - دەپ مالىمدەدى.

وسىدان بىرنەشە كۇن بۇرىن وزبەكستان باس پروكۋراتۋراسى «گۇلنارا كارىموۆا جازاسىن وتەۋ شارتتارىن بۇزعانى ءۇشىن جالپى رەجيمدەگى كولونياعا اۋىستىرىلدى» - دەگەن حابار تاراتقان.

گۇلنارا كارىموۆانىڭ قىزى يمان ونىڭ اناسىن باس پروكۋراتۋرا قىزمەتكەرلەرى كولونيادان بوساتىلعاننان كەيىن تاشكەنتتەگى پاتەرىنەن الىپ كەتكەنىن مالىمدەدى. ول ءوزىنىڭ «Instagram» پاراقشاسىندا: «ساعات 19:00 شاماسىندا وزبەك پروكۋراتۋراسىنىڭ قىزمەتكەرلەرى تاشكەنتتەگى پاتەرىمە باسا-كوكتەپ كىرىپ كەلدى. مەرزىمىنەن بۇرىن شارتتى تۇردە بوستاندىققا شىققان انام وسى پاتەردە 2018 جىلدىڭ ماۋسىم ايىنىڭ سوڭىنان بەرى تۇرادى. بىرنەشە مينۋتتان سوڭ پروكۋراتۋرانىڭ وزگە قىزمەتكەرلەرىمەن بىرگە جەتىپ كەلىپ، انامدى بەلگىسىز جاققا الىپ كەتتى»، – دەپ جازدى. اقپان ايىنىڭ ورتاسىندا گۇلنارا كارىموۆانىڭ ۇلى يسلام «Instagram» جەلىسىندە تەرگەۋشىلەردىڭ جازاسىن وتەپ جاتقان اناسىنا قىسىم كورسەتىپ، ۋاقىتىلى مەديتسينالىق كومەك كورسەتپەگەندىگىن ايتىپ، پرەزيدەنت شاۆكات ميرزيەەۆتەن كومەك سۇراعان.

گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالعان. ءدال وسى جىلى تاشكەنت قالالىق سوتى ونى «اسا ءىرى كولەمدە قارجى جىمقىرۋ»، «بوپسالاۋ»، «سالىقتان جالتارۋ» ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان.

2017 جىلدىڭ شىلدە ايىندا وزبەكستان باس پروكۋراتۋراسى گۇلنارا كارىموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. جاڭادان تاعىلعان ايىپ بويىنشا، ەكس-پرەزيدەنت قىزى وزبەكستانعا 2 ملرد دوللار كولەمىندە زيان كەلتىرگەن. وزبەكستان رەسمي ورگاندارىنىڭ بۇل مالىمدەمەسىنەن كەيىن گۇلنارا كارىموۆانىڭ الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان.

"The Qazaq Times"