زەينەتاقى جيناقتارىنىڭ جاي-كۇيى تۋرالى اقپارات بەرۋ قىزمەتى ۇزدىكتەر قاتارىنا ەندى

قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ تاپسىرىسى بويىنشا «ساندج» زەرتتەۋ كومپانياسىنىڭ مەملەكەتتىك قىزمەتتەردى كورسەتۋ ساپاسىنا جۇرگىزگەن قوعامدىق مونيتورينگ ناتيجەسىندە «بىرىڭعاي جيناقتاۋشى زەينەتاقى قورى سالىمشىسىنىڭ  زەينەتاقى جيناقتارىنىڭ جاي-كۇيى تۋرالى اقپارات بەرۋ» قىزمەتى ۇزدىك بەستىكتىڭ قاتارىنا ەندى، دەپ حابارلايدى بجزق زەينەتاقى قورىنىڭ ءباسپاسوز قىزمەتى.

مەملەكەتتىك قىزمەتتەردىڭ كورسەتىلۋ ساپاسىنا قاتىستى قوعامدىق مونيتورينگ 2018 جىلدىڭ تامىز-قازان ايلارى ارالىعىندا وتكىزىلدى. زەرتتەۋ بارىسىندا قازاقستاننىڭ بارلىق وڭىرلەرىندە 10 000 قىزمەت الۋشى اراسىندا ساۋالناما جۇرگىزىلگەن ەدى. بۇل رەتتە 60 مەملەكەتتىك قىزمەت  نەگىزگە الىندى. سونىمەن قاتار، «قۇپيا ساتىپ الۋشى» ءادىسى بويىنشا باقىلاۋ جۇرگىزىلىپ، بىرقاتار فوكۋس-توپتىق تالقىلاۋلار ۇيىمداستىرىلدى.

زەرتتەۋ جۇرگىزۋدەگى ماقسات – قىزمەت الۋشىلاردىڭ كورسەتىلەتىن قىزمەتتەردىڭ ساپاسىنا قاناعاتتانۋشىلىق دەڭگەيىن باعالاۋ. بۇل رەتتە اقپاراتتىڭ قولجەتىمدىلىگى، قىزمەت كورسەتۋ مەرزىمىنىڭ ساقتالۋى، قىزمەت كورسەتۋ دەڭگەيى (سىپايىلىق، بىلىكتىلىك، قىزمەتكەرلەردىڭ شاپشاڭدىعى), قۇجاتتاردىڭ دۇرىس راسىمدەلۋى، شارتتاردىڭ ىڭعايلىلىعى ەسكەرىلدى.

زەرتتەۋ قورىتىندىسى بويىنشا بجزق سالىمشىسىنىڭ (الۋشىسىنىڭ) زەينەتاقى جيناقتارىنىڭ جاي-كۇيى تۋرالى اقپارات بەرۋ قىزمەتىنە باعا بەرۋ بارىسى اقپاراتتىڭ ساپاسى مەن قولجەتىمدىلىگى، جەدەلدىگى مەن قۇزىرەتتىلىگى بويىنشا جوعارى ناتيجەلەر كورسەتتى: ساۋالناماعا جاۋاپ بەرۋشىلەردىڭ 80,4 پايىزى قىزمەتتەر بويىنشا اقپاراتتىڭ اشىقتىعىنا جانە قولجەتىمدىلىگىنە ريزا. بۇل رەتتە جاۋاپ بەرۋشىلەردىڭ 82,9 پايىزىنىڭ پىكىرىنشە اقپاراتتار اشىق جانە شىنايى. جاۋاپ بەرۋشىلەردىڭ 88,3 پايىزىنىڭ قىزمەتتەردىڭ كورسەتىلۋ مەرزىمىنە جانە 92,1 پايىزىنىڭ قۇجاتتاردىڭ جينالۋ جانە ازىرلەۋ مەرزىمىنە كوڭىلدەرى تولادى.

ساۋالناماعا قاتىسۋشىلاردىڭ 79,8 پايىزى قىزمەت كورسەتۋشىنىڭ ماماندارىنىڭ بىلىكتىلىگىن جوعارى باعالاسا، 80,7 پايىزى ءۇشىن قىزمەتكەرلەردىڭ سىپايىلىعى، ادەپتىلىگى قاناعاتتانارلىق دەڭگەيدە بولدى. سونىمەن قاتار قىزمەتكەرلەرىنىڭ شاپشاڭدىعىن ساۋالناماعا جاۋاپ بەرۋشىلەردىڭ 81,3 پايىزى اتاپ وتسە، 80,4  پايىزى قىزمەت كورسەتۋشىگە سەنەدى.

"The Qazaq Times"