قازاقستانداعى 2019 جىلعا جوسپارلانعان حالىق ساناعى 2020 جىلعا اۋىستىرىلدى.

بيلىكتىڭ قاۋلىسىنا سايكەس، رەسپۋبليكا ايماعىنداعى ازاماتتاردى تىركەۋ ءاربىر 10 جىلدا ءبىر رەت جۇرگىزىلىپ وتىرۋ ءتيىس ەدى. سوڭعى رەت 2009 جىلى وتكەن ساناق 2019 جىلى ەلەكتروندى فورمات تۇرىندە جۇرگىزىلەتىندىگى ءسوز بولعان.

2017 جىلى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بولاشاققا باعدار جاساپ، 33 جىلدان كەيىن، قازاقستاندا 24,5 ملن ادام ءومىر سۇرەتىندىگى تۋرالى مالىمدەگەن بولاتىن. بىراق، سوڭعى جىلدارداعى ەكونوميكالىق جاعدايلار مەن قوعامداعى كوپبالالى وتباسىلارعا جاسالىپ جاتقان جاعدايدىڭ تىم تومەندىگىنەن مۇنداي ستاتيستيكانىڭ شىعۋ-شىقپاۋى ەكىتالاي ەكەندىگى راس.

سونىمەن قاتار، ەلباسى نۇرسۇلتان نازارباەۆ بۇعان دەيىن 2020 جىلى قازاقستان حالقىنىڭ سانىن 20 ملن-عا جەتكىزۋ قاجەت ەكەنىن ايتقان.  بىراق، مۇنىڭ قانشالىقتى ورىندالاتىندىعى ازىرگە بەلگىسىز. سەبەبى، بىلتىر عانا ۇلتتىق ەكونوميكا ءمينيسترى 1 شىلدەدە قازاقستاندا 18 034,3 مىڭ ادام تۇراتىندىعىن جاريالاعان. بۇل ستاتيستيكالارعا قاراپ وتىرىپ، 33 جىلدا 6 ميلليون ادامعا وسەتىن ەلىمىزدە، كەلەر جىلعا دەيىن 2 ميلليون ادامنىڭ قوسىلاتىندىعىنا سەنۋ قيىن.

حالىقتىڭ ءوسۋىن كوزدەپ وتىرعان بيلىكتەگىلەر، كوپبالالى وتباسىلارعا 16000 تەڭگە جاردەماقى بەرىپ جارىلقاۋدا. وسىدان كەيىن، ستاتيستيكانىڭ قانداي بولاتىندىعىن ەلەستەتۋدىڭ ءوزى دە بۇلىڭعىر بولاشاقتىڭ ەنشىسىندە.

"The Qazاq Times"