قىرعىزستان پارلامەنتىندە قازاقستان مەن وزبەكستانعا سۋ ساتۋ ماسەلەسى تالقىلاندى.

جوعارى كەڭەس دەپۋتاتتارى قىرعىزستان رەسپۋبليكاسىنىڭ «سۋ كودەكسىندەگى» «سۋ تۋرالى» زاڭىنا وزگەرتۋلەر مەن تولىقتىرۋلار ەنگىزۋ جونىندەگى كەزەكتى وتىرىسىن وتكىزدى. وتىرىستا دەپۋتاتتار قازاقستان مەن وزبەكستانعا سۋ ساتۋ كەرەكتىگىن ايتىپ، «سۋ تۋرالى زاڭدى» وزگەرتۋدى  ۇسىندى.

«22 ميلليارد مەتر كۋب سۋ جىل سايىن قىرعىز سۋ قويمالارىنان قازاقستان مەن وزبەكستانعا جىبەرىلەدى. بۇل قويماعا جينالعان سۋدىڭ 80 پايىزى. جاقىندا ءبىز توقتاعۇل سۋ قويماسىنا جوندەۋ جۇمىستارىن جۇرگىزۋگە 450 ميلليون دوللار بولۋگە بايلانىستى ماسەلەنى تالقىلادىق. نەگە ءبىزدىڭ ۇكىمەت كورشىلەرىمىزدەن سۋ العانى ءۇشىن اقشا سۇرامايدى؟» - دەدى جوعارى كەڭەس دەپۋتاتى ۇمبەتالى قىدىراليەۆ.

قىرعىزستان اۋىلشارۋاشىلىعى، تاماق ونەركاسىبى جانە مەليوراتسيا ءمينيسترىنىڭ ورىنباسارى جانىبەك كەرىماليەۆتىڭ سوزىنشە، ەگەر پارلامەنت ««سۋ تۋرالى زاڭعا» ەنگىزىلگەن وزگەرتۋلەر مەن تولىقتىرۋلاردى قابىلدايتىن بولسا، قىرعىزستان كورشى مەملەكەتتەردەن سۋ ءۇشىن قارجى تالاپ ەتۋگە مۇمكىندىك الادى.

كەرىماليەۆتىڭ ايتۋىنشا، وسىعان دەيىن قازاقستان سۋ العانى ءۇشىن قىرعىزستانعا جىلىنا 75 ميلليون تەڭگە (197 474 دوللار) تولەپ كەلگەن. قازىرگى ۋاقىتتا بۇل سومما 119 ميلليون تەڭگەگە (313 326 دوللارعا) وسكەن. بىراق قازاقستان بۇل قارجىنى سۋ العانى ءۇشىن ەمەس، سۋ قويمالارىن جوندەۋدەن وتكىزۋ ءۇشىن تولەگەن.

2000 جىلدارى قىرعىزستان پارلامەنتىندە ءدال وسى ماسەلەنى سول كەزدە جوعارى كەڭەس دەپۋتاتى بولعان تۋرداكۋن ۋسۋباليەۆ كوتەرگەن بولاتىن. بىراق، بۇل باستاماعا سول كەزدەگى وزبەكستان پرەزيدەنتى يسلام كارىموۆ قارسى شىعىپ، «سۋ جالپىعا ورتاق ترانسۇلتتىق مەنشىك» ەكەندىگىن ايتقان.

"The Qazaq Times"