تۇركىمەنستان ستۋدەنتتەرى ءتۇرلى تالاپتاردىڭ تۇتقىنىنا اينالدى

تۇركىمەنستان ستۋدەنتتەرى قىسقى دەمالىس قارساڭىندا جاڭا شەكتەۋگە تاپ بولدى. 25 قاڭتاردا باستالعان ۋاقىتشا ءۇزىلىس كەزىندە شاكىرتتەردىڭ بارلىعى تەلەفون قولدانباۋعا جانە عالامتور جەلىلەرىنە كىرمەيتىندىگى تۋرالى قول حات جازىپ بەرگەن. بۇل تۋرالى تۇركمەنستاننىڭ «ازاتلىق» راديوسى حابارلاپ وتىر.

وسى رەتتى تۇركىمەن ەلىنىڭ ستۋدەنتتەرىنە مۇنىڭ الدىندا تاعى ءبىر تالاپ قويىلعاندىعىن ەسكەرە كەتكەن ءجون. قىسقى دەمالىستا ءوز ۇيلەرىنە اتتانار شاكىرتتەردىڭ بارلىعىنا پويىز، ۇشاق جانە مەملەكەتتىك اۆتوبۋستاردى عانا پايدالانۋ كەرەكتىگى جونىندە حابارلانعان. جەكە تاكسي قىزمەتىنىڭ كومەگىنە جۇگىنۋگە تولىعىمەن شەكتەۋ قويىلعان بولاتىن. ال، قايتا ساباققا كەلگەن ستۋدەنتتەردىڭ بارلىعى بيلەتتەرىن دەكاناتقا كورسەتىپ، مەملەكەت رۇقسات بەرگەن كولىكتەرمەن جۇرگەندىگىن دالەلدەۋى ءتيىس. وسىعان بايلانىستا تۇركىمەنستانداعى دەمالىسقا شىققان ستۋدەنتتەر ءبىر قالادان ەكىنشى قالاعا قاتىنايتىن كولىكتەردىڭ بيلەتتەرىنىڭ تاپشىلىعىن سەزىنۋدە. ءتىپتى، وزگە امالىن قاراستىرعان جاستار جەمقورلىققا جول بەرىپ وتىرعاندىقتارىن دا ماماندار بىرنەشە رەت بايقاعان.

نەگىزىنەن تۇركىمەنستان ەلىندەگى ستۋدەنتتەر قاتاڭ باقىلاۋدا ۇستالىپ وتىر. سونىمەن بىرگە، ارنايى كيىم فورمالارى دا باسشىلىقتىڭ قاراۋىندا تۇر. قىمبات اشەكەي بۇيىمدار كيىپ، ءساندى مانيكيۋر جاساعىسى كەلگەن ستۋدەنت قىزداردىڭ ارەكەتىنە دە شەكتەۋ بار. بۇدان بولەك، جوعارعى وقۋ ورىنىندا وقيتىن شاكىرتتەرگە اۆتوكولىك جۇرگىزۋگە دە توسقاۋىل قويىلعان.

بەلارۋسسيانىڭ ەكونوميكالىق ۋنيۆەرسيتەتىنىڭ باسشىلىعى مۇنداي قىسىدا وسكەن جاستار، شەت ەلدەردە بىردەن بۇزىلاتىندىعىن دا جوققا شىعارمايدى. ءتىپتى، ىشىمدىككە اۋەس بولىپ، قوقىستاردى جان-جاققا لاقتىرىپ، توبەلەسكەندەرىن دە بايقاعان.

تۇركىمەنستان بيلىگىنىڭ ستۋدەنتتەرگە جاساعان قىسىمى قاي ۋاقىتقا دەيىن جالعاساتىندىعى بەلگىسىز. ءارتۇرلى شەكتەۋلەر مەن قاتاڭ تالاپتار، ولاردىڭ ەركىن ءبىلىم الۋى مەن اياق الىپ جۇرۋىنە كەدەرگى جاساپ وتىرعاندىعىن ساراپشىلار سارالاپ وتىر. سونىمەن قاتار، تولعان شىنىنىڭ ءبىر كۇنى جارىلاتىندىعىن دا ماماندار جوققا شىعارمايدى. بىراق، اشۋعا بۋلىققان جاستاردىڭ سول ۋاقىتتاعى ارەكەتى شەكتەن شىعىپ كەتپەيتىندىگىن دە ەشكىم ءدوپ باسىپ ايتا المايدى.

  "The Qazaq Times"