ءسۇريا فوتو: cont.ws

رەسەيدىڭ سانكت-پەتەربور قالاسىندا ءسۇريا ەلىنە اتتانباق بولعان وزبەكستاندىق جاسۋربەك يۋلداشەۆ قاماۋعا الىندى.

ءدىني ەكسترەميستىك «كاتيبا تاۋحيل ءال-جيحاد» اسكەري توبىنا قوسىلۋعا ارەكەت جاساعان ازامات Telegram جانە WhatsApp الەۋمەتتىك جەلىسى ارقىلى ءوزىنىڭ سىبايلاستارىمەن كەلىسىمگە كەلمەك بولعان. الايدا، دەر كەزىندە قۇرىقتاي بىلگەن پەتەربورلىق ماماندار ونىڭ جولىنا توسقاۋىل قويا ءبىلدى.

رەسەي فەدەراتسياسىنىڭ تەرگەۋ باسقارماسى ءباسپاسوز-حاتشىسىنىڭ مالىمەتىندە «بەيتانىس جاندار يۋلداشەۆتىڭ الدىمەن قاۋىپسىز جولدار ارقىلى كەدەندىك باقىلاۋ ورىنىنا جەتكىزىپ، كەيىننەن جاتتىعۋ لاگەرىنە جىبەرۋگە كەلىسكەن. وندا اسكەري تاكتيكالاردى مەڭگەرىپ تەرروريستىك امالدار ارقىلى سۋىق قارۋمەن جۇمىس ىستەۋدى ۇيرەتەمىز دەپ ۋاعدالاسقان» دەلىنگەن.

سونداي-اق يۋلداشەۆ بۇل ارەكەتكە بارماستان بۇرىن 50 مىڭ رۋبل كولەمىندە قارجى جيناعاندىعى بەلگىلى بولدى.  بۇدان بولەك جەكە زاتتارىن ساتۋ ارقىلى ماسكەۋگە جەتىپ، ودان كەيىن ۋكرايناعا ارعىسى ءسۇريادان ءبىر-اق شىعۋ دەگەن جوسپارى بارى دا اشكەرەلەندى.

قازىرگى تاڭدا پەتەربور بيلىگى 2019 جىلدىڭ 20 قاڭتارىنا دەيىن قاماۋعا جابىلعان ازاماتتى ۋاقىتشا ۇستاۋ يزولياتورىنا جىبەرۋ تۋرالى شەشىم شىعاردى.

ەستەرىڭىزگە سالا كەتەيىك، قازاقستان جەرىنەن سۇرياعا 900-گە جۋىق ازامات اتتانعان. حالىقارالىق تەرروريستىك ۇيىمنىڭ مالىمەتى بويىنشا،  120-دان اسا ەر ادام، 250-گە تارتا نازىك جاندىلار مەن 500-دەن استام كامەلەتتىك جاسقا تولماعاندار سودىرلاردىڭ جاقتاستارىن تولتىرعان.

"The Qazaq Times"