بىرىككەن كورولدىكتىڭ ادام قۇقىقتارى جونىندەگى سۇريالىق وبسەرۆاتورياسى (SOHR) سوڭعى 48 ساعات ىشىندە سۇرياداعى شىعىس گۋتاعا (Eastern Ghouta ) جاسالعان قارۋلى شابۋىل مەن اۋە سوققىلارىنان كەمىندە 250 ادام قايتىس بولعانىن حابارلادى، - دەپ مالىمدەيدى CNN اقپارات اگەنتتىگى. 

قۇربانداردىڭ 58-ءى بالالار، 42-ءسى ايەل ادامدار. جالپى 1200-دەن استام ادام ءتۇرلى جاراقات العان.

SOHR-دىڭ مالىمەتىنشە، سەيسەنبى كۇنى كەمىندە 106 ادام قايتىس بولعان. 2013 جىلى ايماققا جاسالعان حيميالىق شابۋىلدان بەرى (1400 ادام مەرت بولدى) ەڭ كوپ ادام شىعىنى كەشە بولىپ وتىر.

گۋتاداعى اۋرۋحانا باسشىسى مەن پەدياتر اماني باللۋر (Amani Ballour): "بىزگە بىرنەشە مارتە اۋە كۇشتەرى شابۋىل جاساعان. بىراق مۇندايدى ءبىرىنشى رەت كورىپ وتىرمىز", - دەدى.

دارىگەرلەر جارالانعانداردىڭ بارلىعىنا كومەك كورسەتىپ ۇلگەرۋ ءۇشىن دەمالماي جۇمىس ىستەپ جاتىر. دۇيسەنبى كۇنى شابۋىل كەسىرىنەن بىرنەشە اۋرۋحانا قيراعانى حابارلاندى. ەلدە مەديتسينالىق قۇرىل-جابدىقتار مەن ءدارى-دارمەكتەردىڭ تاپشىلىعى 2012 جىلدان بەرى جويىلماي كەلەدى.

شىعىس گۋتانى ال-كايدامەن بايلانىستى Hayat Tahrir al-Sham-دى ("Jabhat al Nusra" اتىمەن بەلگىلى بولعان)  قوسقاندا ءتۇرلى يسلامدىق توپتار باقىلاۋىنا الىپ العان. سۇريالىق كۇشتەر گۋتاعا شابۋىلىن كۇشەيتىپ،  اتالعان توپتار قاراماعىنداعى ەلدىڭ باسقا دا ايماقتارىنا شابۋىلداۋعا كوشەدى.

جالپى شىعىس گۋتادا شامامەن 400 مىڭ ادام تۇرادى. بۇۇ اقپاراتىنشا، جەرگىلىكتى حالىقتىڭ باسىم كوپشىلىگى گۋمانيتارلىق كومەككە مۇقتاج.

يگيل ءوزىنىڭ تەرريتوريالىق بازاسىنان ايرىلعاننان كەيىن سۇريالىق كۇشتەر (رەسەي قولداۋىمەن) ەلدىڭ باسقا ايماقتارىن قولعا الۋعا كىرىسەدى. گۋتانىڭ شىعىسىنداعى شابۋىل تاعى ءبىر "دەەسكالاتسيالىق ايماق" سانالاتىن يدليب (Idlib) ايماعىنداعى (1 ملن تۇرعىنى بار) شابۋىلمەن قاتار ءجۇرىپ جاتىر.  شىعىس گۋتاداعى شابۋىل زاردابى 2016 جىلى الەپپوداعى شابۋىلدان دا اۋىر بولايىن دەپ تۇر.

ايتا كەتەرلىگى، رەسەي، تۇركيا جانە يران اراسىنداعى كەلىسىمدە شىعىس گۋتا "دەەسكالاتسيالىق ايماق" بولىپ ەسەپتەلەدى. تەوريالىق تۇرعىدا مۇنداي ايماقتار سۇرياداعى سوعىس شەڭبەرىندە بولىپ جاتقان قانداي دا شابۋىلداردان تىس، حالىق بەيبىت ءومىر سۇرە الاتىن، قاۋىپسىز ايماق سانالادى. سوڭعى 48 ساعاتتا شىعىس گۋتادا بولعان جاعداي حالىقارالىق نارازىلىق تۋدىردى.

“The Qazaq Times”