لوندون فوتو: Life.ru

ۇلىبريتانيا ءوزىنىڭ ەو سەرىكتەستەرىمەن بىرگە ادام قۇقىعىنىڭ تاپتالۋىنا بايلانىستى ەر-ريادقا جاڭا سانكتسيا سالۋدىڭ مۇمكىندىكتەرىن قاراستىرىپ وتىر. ونىڭ ەڭ باستى سەبەبى ساۋديالىق جۋرناليست جامال حاشوگگيدىڭ ايۋاندىقپەن قازا تابۋى. بۇل تۋرالى بريتانيانىڭ سىرتى ىستەر مينيسترلىگى حابارلادى. 

قۇجاتتا كورسەتىلگەندەي لوندون ءوزىنىڭ ناقتى باعىتىندا قالىپ، حاشوگگي قازاسىنا قاتىسى بارلاردىڭ ادىلەتتى جازاعا تارتىلۋىن كوزدەپ وتىر.

«ۇلىبريتانيا جانە ونىڭ سەرىكتەستەرىنىڭ كەلەسى قادامى ساۋد ارابياسىنىڭ سوڭعى سوزىنە بايلانىستى بولماق. ءبىز مۇنداي وقيعانىڭ بولاشاقتا قايتالانباۋىنا سەنىمدى بولۋىمىز كەرەك. قازىرگى تاڭدا ەۋرو وداقتاعى سەرىكتەستەرىمىزبەن بارلىق مۇمكىندىكتەردى قاراستىرىپ، ەر-ريادتىڭ ادام قۇقىعىن جابايىلىقپەن بۇزعاندىعى ءۇشىن جاھاندىق سانكتسيا سالۋدى كوزدەپ وتىرمىز»، دەپ بريتانيانىڭ سىرتقى ىستەر مينيسترلىگىنىڭ مالىمدەمەسىندە جازىلعان.

سول سەكىلدى مالىمدەمەدە ۇلىبريتانيا ءوزىنىڭ سوڭعى شەشىمىن حاشوگگي ءىسى اياقتالعاننان كەيىن بىراق قابىلدايتىندىعى دا ەسكەرتىلگەن.

ەستەرىڭىزگە سالا كەتەيىك، جامال حاشوگگي 2 قازاندا ىستامبۇلداعى ساۋد ارابيا كونسۋلدىعىندا ءىزىم-عايىم جوعالىپ كەتكەن. بىرنەشە كۇننەن سوڭ مارقۇمنىڭ دەنە بولشەكتەرى قالا ماڭىنان تابىلدى. وتكەن اپتادا ساۋد ارابياسى حاشوگگيدى كونسۋلدىقتا «قىلقىندىرىپ ولتىرگەنىن» مويىنداپ، حالىقارالىق قاۋىمداستىقتىڭ قاتاڭ سىنىنا ۇشىرادى. بۇل تاراپ «حاشوگگي ىسىنە» قاتىسى بار ون سەگىز ادامدى تۇتقىنعا الدى جانە جوعارى شەندى بەس كەڭەسشىنى لاۋازىمىنان ايىردى. سونداي-اق، تاق مۇراگەرى مۇحاممەد سالماننىڭ دا ورىنىن بوساتۋى ابدەن مۇمكىن.

"The Qazaq Times"