فوتو: راديو سۆوبودا

«شەكاراسىز رەپورتەرلار» (Reporters Without Borders) حالىقارالىق ۇيىمى جاڭالىقتار سايتتارىن بۇعاتتاعان تاجىكستان ارەكەتىن سىنعا الدى.

«تاجىكستان قىتايدىڭ ينتەرنەت-تسەنزۋرا مودەلىن ۇستانىپ وتىر» دەلىنگەن «شەكاراسىز رەپورتەرلار» ۇيىمىنىڭ 15 قاراشادا جارىق كورگەن مالىمدەمەسىندە.

حالىقارالىق ۇيىم مالىمەتىنشە، 6 قاراشادا حوروگ تۇرعىندارى جاپپاي ميتينگكە شىققاندا، الەۋمەتتىك جەلىلەر مەن جاڭالىقتار سايتى جۇمىس ىستەمەي قالعان.تاجىكستان بيلىگى "ازيا-پليۋس" جاڭالىقتار پورتالىن، YouTube, Facebook, "ۆكونتاكتە" جانە "ودنوكلاسسنيكي" سەكىلدى الەۋمەتتىك جەلىلەردى بۇعاتتاپ تاستاعان. سونىمەن بىرگە WhatsApp پەن Telegram مەسسەندجەرلەرى ىستەن شىعارىلعان.

​“جاپپاي ينتەرنەت-تسەنزۋراعا جول بەرىلمەۋ كەرەك. تاجىكستان بيلىگى تسەنزۋرانىڭ تۇپتەپ كەلگەندە ءتۇرلى وسەككە جول بەرىلەتىنىن ەسەپكە الۋ كەرەك. حالىقارالىق قاۋىمداستىق قىتاي مودەلىن ۇستانباۋى ءتيىس”، - دەپ مالىمدەدى "شەكاراسىز رەپورتەرلەر" ۇيىمىنىڭ شىعىس ەۋروپا جانە ورتالىق ازيا ءبولىمىنىڭ باسشىسى يوحانن بير.

تاجىكستاننىڭ تاۋەلسىز بۇقارالىق اقپارات قۇرالدارى ۇلتتىق اسسوتسياتسيا باسشىسى نۋريددين كارشيبوەۆ بيلىك ارەكەتىن “اكىمشىلىك فەوداليزم” رەتىندە سۋرەتتەيدى. ء“بىز سايتتاردى بۇعاتتاۋ ازاماتتاردىڭ كونستيتۋتسيالىق قۇقىعىن بۇزاتىنىن ۇنەمى ايتىپ كەلەمىز", - دەيدى ول.

ەستەرىڭىزگە سالايىق، وسىدان بىرنەشە اپتا بۇرىن قازاقستان ۇكىمەتى دە «توتەنشە جاعدايلاردا عالامتوردى بۇعاتتاۋعا» بايلانىستى قاۋلى شىعارعان. قاۋلىعا سايكەس، ءىىم، ۇقك، قورعانىس مينيسترلىگى جانە باس پروكۋراتۋرا ينتەرنەتتى بۇعاتتاۋعا قۇقىلى. كوپتەگەن ساراپشىلار ۇكىمەتتىڭ بۇل قادامىنا «بيلىكتىڭ بۇراندانى كەزەكتى مارتە بۇراۋى» دەگەن باعا بەرۋدە.

"The Qazaq Times"