دونالد ترامپ: «تەرگەۋ تۇككە تۇرعىسىز!»

اقش پرەزيدەنتى دونالد ترامپ 2016 جىلعى سايلاۋ ءىسىن تەرگەۋمەن اينالىساتىن ارنايى پروكۋرور روبەرت ميۋللەردىڭ سۇراقتارىنا جاۋاپ بەردى.

روبەرت ميۋللەر 2017 جىلدان باستاپ دونالد ترامپتىڭ سايلاۋ شتابى مەن رەسەيلىك بيلىك اراسىنداعى كەلىسىمدى زەرتتەۋمەن اينالىسىپ كەلەدى. ونىڭ ويىنشا، پرەزيدەنت سايلاۋى ادىلەتسىز وتكەن. ال ترامپ ءۇشىن ميۋللەردىڭ ساۋالدارىنا جاۋاپ بەرۋ مۇلدە قيىندىق تۋعىزعان جوق جانە ول پروكۋروردىڭ ارەكەتىن «شايتان اۋلاۋ» دەپ اتادى.

بەيسەنبى كۇنى ترامپ ءوزىنىڭ Twitter پاراقشاسىندا «ميۋللەر – جانجال تۋعىزۋدى جانى سۇيەتىن ادام، ال تەرگەۋ – نەگىزسىز جانە تۇككە تۇرعىسىز. وسى تەرگەۋگە اتسالىسىپ جاتقاندار ءبىزدىڭ ۇلتتى ۇياتقا قالدىرۋشىلار!» –دەپ جازدى. ونىڭ ويىنشا، وسى ىسكە قاتىستى سۇراق قويعان ادامداردىڭ ارام پيعىلى بولۋى مۇمكىن. بۇعان دەيىن اق ۇيدە وتكەن ءباسپاسوز ءماسليحاتىندا ترامپ: «تەرگەۋگە سالىنعان ميلليونداعان، ميللياردتاعان دوللارلار كوككە ۇشتى. مەن تەرگەۋشىلەردىڭ شالىس باسقانىنا سەنىمدىمىن، سەبەبى ولار شايتان اۋلاعىشتار» – دەگەن بولاتىن.

بۇعان دەيىن «Washington Post» باسىلىمىنا اق ءۇي باسشىسىنىڭ پروكۋرورى رۋدي دجۋلياني پرەزيدەنت سايلاۋعا قاتىستى سۇراقتار «پايداسىز، وزەكتى ەمەس جانە ارنايى تۇزاق» بولعاندىقتان، جاۋاپ بەرمەيتىنىن ايتقان.

"The Qazaq Times"