گورباچەۆ: الەمگە ءتونىپ تۇرعان ەڭ باستى قاۋىپ - جاڭا قارۋلانۋ جارىسى

كەڭەستەر وداعىنىڭ العاشقى جانە سوڭعى پرەزيدەنتى ميحايل گورباچەۆ: «الەمگە ءتونىپ تۇرعان ەڭ باستى قاۋىپ - جاڭا قارۋلانۋ جارىسى» - دەپ مالىمدەدى.

قاراشا ايىنىڭ 8-ءى كۇنى گەرمانيالىق رەجيسسەر ۆەرنەر گەرتسوگ پەن ۇلىبريتانيالىق دوكۋمەنتاليست اندرە سينگەردىڭ كەڭەستەر وداعىنىڭ العاشقى جانە سوڭعى پرەزيدەنتى تۋرالى تۇسىرگەن ءفيلىمىنىڭ تۇساۋ كەسەرىندە گورباچەۆ اتىنداعى قوردىڭ ءباسپاسوز حاتشىسى پاۆەل پالاجچەنكو ەكس-پرەزيدەنتتىڭ حاتىن وقىدى.

حاتتا ميحايل گورباچەۆ قازىر الەمدە بولىپ جاتقان جاپپاي قارۋلانۋ جارىسىنا قاتىستى ءوز ويىن ايتقان. ول وندا: «قازىر ءبىز الەمدى ارتقا لاقتىرىپ تاستايتىن ارەكەتتەردى كورىپ وتىرمىز. الەمگە ءتونىپ تۇرعان ەڭ باستى قاۋىپ – جاڭا قارۋلانۋ جارىسى. بۇگىنگى تاڭدا يادرولىق سوعىستى قالىپتى جاعداي رەتىندە تالقىلاۋدا. وعان نەمقۇرايلى قاراپ، سوعىسقا دايىندىق جۇمىستارىن جۇرگىزۋدە. بۇدان ارى باراتىن جول جوق. مەن يادرولىق سوعىستى توقتاتۋعا بولاتىنىنا سەنەمىن جانە سوعان بار كۇش-جىگەرىمدى جۇمسايمىن» - دەگەن.

ەستەرىڭىزگە سالايىق، بۇعان دەيىن ميحايل گورباچەۆ اقش پرەزيدەنتى دونالد ترامپتىڭ رەسەيمەن اراداعى زىمىران كەلىسىمىنەن شىعۋىن ۇلكەن قاتەلىك دەپ باعالاپ، الەم جاڭا جاپپاي قارۋلانۋ جارىسىنا اياق باستى دەپ مالىمدەگەن. اقش پەن كەڭەستەر وداعى اتالمىش كەلىسىمگە 1987 جىلى ميحايل گورباەچەۆ پرەزيدەنت بولىپ تۇرعان تۇستا قول قويعان.

"The Qazaq Times"