ۋكراينا رەسەيلىك «مادەنيەت ونىمدەرىنە» تىيىم سالدى

ۋكراينانىڭ جيتومير وبلىسى ءورىستىلدى مادەني ونىمدەرگە تولىقتاي تىيىم سالدى. وسىعان دەيىن مۇنداي تىيىم لۆوۆ وبلىسىندا ەنگىزىلگەن.

ۋنيان اگەنتتىگىنىڭ حابارلاۋىنشا، رەسەيلىك مادەني سالاداعى ونىمدەردەن باس تارتۋ تۋرالى اكتىنى وبلىستاعى كەڭەس دەپۋتاتتارى ءبىر اۋىزدان قابىلداعان. تىيىم اكتىسى بويىنشا، ەندى ءورىستىلدى باعدارلاما، فيلمدەردى كورسەتۋگە، اقپاراتتاردى جاريالاۋعا بولمايدى. سونداي-اق رەسەيلىك ونەرپازداردىڭ گاسترولدىك ساپارمەن كەلۋىنە دە قاتاڭ تىيىم سالىنعان. ۋكراينا زاڭىنا سايكەس، جاڭادان قابىلدانعان اكت جالپىعا ورتاق جانە جەرگىلىكتى ءوزىن-ءوزى باسقارۋ ورىندارى ءبىرىنشى كەزەكتە جۇزەگە اسىرۋى ءتيىس.

وبلىس دەپۋتاتتارىنىڭ ايتۋىنشا،  «قاتاڭ تىيىم» ۋكراين ءتىلىنىڭ قولدانىلۋ اياسىن كەڭەيتۋ ماقساتىندا جاسالىپ وتىر. «رەسەي ۋكراينا اۋماعىن باسىپ الۋدان تولىقتاي باس تارتپايىنشا» اتالعان اكت ءوز كۇشىن جويمايدى.

"The Qazaq Times"