قىتاي مەن اقش قورعانىس مينيسترلەرى سينگاپۋردا كەزدەستى. فوتو: VOA/تۆيتتەر.

سينگاپۋردا ءوتىپ جاتقان اسەان قورعانىس مينيسترلەرىنىڭ كەڭەيتىلگەن وتىرىسى اياسىندا اقش پەن قىتايدىڭ قورعانىس مينيسترلەرى كەزدەسۋ وتكىزگەن. بۇل تۋرالى بۇگىن اقش قورعانىس مينيسترلىگىنىڭ وڭتۇستىك ازيا مەن وڭتۇستىك-شىعىس ازياعا جاۋاپتى  وكىلى دەۆيد يستبۋرن (David Eastburn) ءوزىنىڭ تۆيتتەر پاراقشاسىندا جازدى.

سوڭعى بىرنەشە ايداعى اقش-قىتاي اراسىنداعى قاتىناستار تولقۋلار مەن تۇراقسىزدىققا تولى بولدى. ەستەرىڭىزدە بولسا، اقش قورعانىس ءمينيسترى جەيمس مەتتيستىڭ قازان ايىنا جوسپارلاعان قىتاي ساپارىن كۇشىنەن قالدىرعان بولاتىن. سوندىقتان، بۇل رەتكى مەتتيس پەن قىتاي قورعانىس ءمينيسترى ۋەي فىڭحىنىڭ (Wei Fenghe) كەزدەسۋى الەم اقپارات قۇرالدارىنىڭ نازارىنا ىلىكتى.

اقش قورعانىس ءمينيسترىنىڭ كەزدەسۋدەگى سوزىندە، ۋشينگتون مەن بەيجىڭ قاتىناسىنىڭ قايشىلىقتىڭ جالعاسا بەرمەيتىنىن بىرنەشە رەت قايتالادى.

وڭتۇستىك ازياعا ىستەرى جونىندەگى پەنتاگون حاتشىسىنىڭ كومەكشىسى سيۋ رۋفۋ سينگاپۋرداعى بۇقارالىق اقپارات قۇرالدارىنا بەرگەن مالىمەتىندە: «مەتتيس پەن ۋەي فىڭحى اراسىندا رەسمي كەزدەسۋدىڭ ءوتۋى ەكى ەلدىڭ دە قورعانىس سالاسىنداعى قايشىلىقتىڭ جالعاسا بەرۋىن قالامايتىنىن انىق كورسەتەدى»،  – دەگەن.

اقش-تىڭ ءۇندى-تىنىق مۇحيت قولباسشىلىق باس شتابىنىڭ كومانديرى دەۆيدسون جانە اقش اسكەري قولباسشىلىق باس شتابىنىڭ توراعاسى گەنەرال دەنفورد پەنتاگون باسشىسىمەن سينگاپۋردا كەزدەستى.  قۇراما شتاتتىڭ جوعارى اسكەري شەندىلەرىنىڭ بۇل كەزدەسۋىندە ءۇندى-تىنىق مۇحيت ايماعىنداعى جەرگىلىكتى كۇشتەرمەن سەلبەسە وتىرىپ، وڭتۇستىك قىتاي تەڭىز ايماعىنداعى قۇراما شتاتتىڭ ىرىقتىلىعىن ساقتاپ قالۋدى ماسەلەلەرىن تالقىلاندى.

وڭتۇستىك قىتاي تەڭىزى تۋرالى اقش پەن قىتايدىڭ ۇستانىمدارى ءالى دە ءبىر جەردەن شىعا قويعان جوق. ەكى ەل اراسىنداعى اسكەري باسەكەنىڭ ءالى دە جالعاسا تۇسەتىنى بايقالادى. دەگەنمەن، بۇل رەتكى كەزدەسۋ تاراپتاردىڭ قورعانىس سالاسىنداعى قايشىلىقتاردى رەتتەۋگە دەگەن قۇلشىنىستارىنىڭ دا بار ەكەنىن اڭعارتتى. اقش-قىتاي اراسىنداعى تەڭىز داۋى تىكەلەي تەرريتوريالىق داۋ بولماعانىمەن، تەڭىزدەگى ىقپال كۇشىنە دەگەن باسەكە ۋاشينگتون مەن بەيجىڭنىڭ ۇزاق ستراتەگيالىق جوسپارلارىنداعى ۇلكەن كەرەعارلىقتى كورسەتەدى.

“The Qazaq Times”