قازاقستان بىتىمگەرلەرى ليۆانعا اتتاناتىن بولدى.

بۇگىن پارلامەنت ءماجىلىسى قازاقستاندىق بىتىمگەرلەردى ليۆان اۋماعىنا جىبەرۋ جونىندەگى مەموراندۋمدى ماقۇلدادى. قورعانىس ءمينيسترىنىڭ ورىنباسارى تالعات مۇحتاروۆتىڭ سوزىنشە، مەموراندۋمنىڭ باستى ماقساتى قازاقستان قارۋلى كۇشتەرىنىڭ «ليۆان اۋماعىنداعى بۇۇ-نىڭ بىتىمگەر كۇشتەرى» ميسسياسىنىڭ قۇرامىندا بولىپ، ارنايى قۇقىقتىق مارتەبە الۋ.

قازارگى ۋاقىتتا ليۆان اۋماعىندا قازاقستاننان بولەك 41 مەملەكەتتىڭ بىتىمگەر اسكەرى بار. ولاردىڭ بارلىعىنىڭ باستى مىندەتى ايماقتاعى تىنىشتىقتى ساقتاۋ جانە كونستيتۋتسيالىق بيلىكتى قورعاۋ. كەلىسىم بويىنشا، قازاقستاننان ليۆان اۋماعىنا 120 سارباز اتتانادى دەپ كۇتىلۋدە. ولار ليۆان اۋماعىندا 6 اي بولادى.

"The Qazaq Times"