الماتى وبلىسىندا سوتتالعاندار دا اپپارات باسشىسى بولا الادى

ءۇش جىلعا كولىك تىزگىندەۋ قۇقىعىنان ايىرىلعان ۇيعىر اۋدانىنىڭ اپارات باسشىسى سۇلتان يسلاموۆتى كىم تايراڭداتىپ وتىر؟ مەملەكەتتىك قىزمەتكەر رەتىندە ورەسكەل قاتەلىكتەرگە بارسا دا نەگە قىزمەتىنەن شەتتەتىلمەيدى؟

بۇنداي سۇراۋلى ءارى سالماقتى ءۋاجدى «ۇرپاق پارىزى» قوعامدىق بىرلەستىگىنىڭ توراعاسى جانەت كەرىمقۇلوۆ ايتتى. ءبىز ەركىن پىكىر الاڭى رەتىندە ايماق تۇرعىنىنىڭ وسى ءبىر اششى پىكىرىن قاز قالپىندا بەرىپ وتىرمىز.

–       ەستىگەن قۇلاقتا جازىق جوق، «ءبىزدىڭ سۇلتاننىڭ قولىندا اڭىزداعى سۇلەيمەن سۇلتاننىڭ جۇزىگى بار. سەبەبى، ونىڭ اماندىعىن اماندىقتىڭ ءوزى جاۋاپتى ەتكەن» دەگەندى دە ەستىدىك. «جەتىسۋ» گازەتىنىڭ (وبلىستىق – رەد.) بيىلعى 29 قىركۇيەكتەگى №108 cانىندا جاريالانعان ادەپ كەڭەسىنىڭ وتىرىسى تۋرالى ماقالادا اۋدان اكىمى اپپاراتىنىڭ باسشىسى سۇلتان يسلاموۆتىڭ كۋالىكسىز كولىك جۇرگىزگەنى، ماس كۇيىندە رۋلدە ۇستالعانى ءۇشىن سوت شەشىمىمەن 28.12. 2018 مەرزىمىنە دەيىن كولىك جۇرگىزۋگە قۇقىعى جوقتىعى انىقتالعانىن، وعان قاتاڭ سوگىس بەرىلگەنىن وقىدىم. ول وسى قىزمەتكە وسىمەن ءۇشىنشى رەت كەلىپ وتىر. ونىڭ الدىڭعى ەكى رەتىندە دە ماسەلە كوتەرىلگەن. ايتالىق، وزىنە تيەسەلى ۇكىمەت بەرگەن ءۇيدى جاقىن تۋىستارىنا بەرىپ، ءوزى شونجىداعى 30 شاقىرىم قاشىقتىقتاعى ۇلكەن اقسۋ اۋىلىنان كۇندەلىكتى قىزمەتتىك كولىكپەن قاتىناپ جۇرگەنى تۋرالى شاعىم تۇسكەن ەدى. الايدا بۇل ماسەلە بەلگىسىز سەبەپتەرمەن اياقسىز قالدى. بۇدان بولەك، س. يسلاموۆ ۇيرەنشىكتى اپپارات باسشىسى لاۋازىمىنا كەزەكتى ءۇشىنشى رەت كەلەردىڭ الدىندا اۋدان اقساقالدارىنىڭ پىكىرىنە اۋدان اكىمى ش. نۋراحنوۆتىڭ  پىسقىرماعانى، وسى جايعا بايلانىستى التى اقساقالدىڭ وبلىس باسشىسىنا جازعان پىكىرلەرى دە ەسكەرىلمەگەنى ەسىمە ءتۇسىپ، «سيىنعانىڭنان سۇيەنگەنىڭ كۇشتى بولسىن» دەگەن ءسوز ەرىكسىز ويعا ورالعان-دى. ويلاڭىزشى، اۋدانداعى اكىمنەن كەيىنگى لاۋازىمدى تۇلعانىڭ وسىنداي ورەسكەل، ءتىپتى قىلمىستى ارەكەتتەرىنەن سوڭ قاراپايىم حالىقتىڭ بيلىككە دەگەن سەنىمى جوعالاتىنى اقيقات. ارتىمىزداعى ۇرپاققا كورسەتكەن ۇلگىمىز وسى بولسا، «سەنگەن قويىم سەن بولساڭ، كۇيسەگەن اۋزىڭدى ۇرايىن» دەمەگەندە نە دەيمىز؟ – دەيدى جانەت ءسادىۇلى.

وسى جايدان سوڭ جانەت كەرىمقۇلوۆ ايتقان ادەپ كەڭەسىنە دە حابارلاستىق. كەڭەس توراعاسى، قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتىنىڭ باسشىسى سەرىكباي نۇرعيساەۆ بۇل ماسەلە تۋرالى:

– سىزگە نە تۇسكەنىن مەن بىلمەيمىن ( قانداي ارىز – رەد.). ءبىزدىڭ بالالار رەيدكە شىققاندا ول جەكە مەنشىك ماشيناسىن كۋالىكسىز ايداعان. ول جۇمىستان الىناتىن ستاتيا ەمەس. ول ادەپ جونىندەگى كودەكسكە قايشى كەلگەن. ءبىز وعان كودەكس شەڭبەرىندە سوگىس بەردىك، – دەيدى سەرىكباي ورىكبايۇلى.

وسىلايشا ءسوزىنىڭ «ءدامىن» بىرىڭعاي «ول» سوزىمەن كەلتىرگەن دەپارتامەنت باسشىسى وزدەرىنىڭ زاڭنان اتتاپ وتە المايتىنىن، تيىسىنشە، س. يسلاموۆ ماسەلەسى دە سول كودەكس شەڭبەرىندە قارالعانىن اتاپ ءوتتى.

ايتا كەتەيىك، 2018 جىلعى 4 تامىز كۇنى ۇيعىر اۋدانىندا قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ «جولداردا سىبايلاس جەمقورلىقتىڭ دەڭگەيىن تومەندەتۋ بويىنشا 10 قادام» جوباسىن ىسكە اسىرۋ ماقساتىندا ارنايى رەيدتىك ءىس-شارالار ۇيىمداستىرىلعان بولاتىن. ناقتىراق ايتقاندا، اتالعان جوبانىڭ بەسىنشى قادامىنداعى «زاڭ الدىندا بارلىعى تەڭ» ءپرينتسيپى كوزدەلگەن. وبلىستىق ىشكى ىستەر دەپارتامەنتىنىڭ جەرگىلىكتى پوليتسيا قىزمەتىمەن بىرلەسىپ اتقارىلعان شاراعا  اۋداندىق «سىبايلاس جەمقورلىققا قارسى ءبىرىنشى مەديا ورتالىق» قوعامدىق بىرلەستىگىنىڭ وكىلى ب. يساباەۆ تا قاتىسادى.

رەيدتىك ءىس جۇرگىزۋ كەزىندە ۇيعىر اۋدانى اكىمىنىڭ اپپارات باسشىسى س. يسلاموۆتىڭ تىزگىندەۋىمەن ۆ 844 اتو مەملەكەتتىك ءنومىرلى «Nissan X-Trail» ماركالى اۆتوكولىك توقتاتىلادى. پوليتسيا قىزمەتكەرلەرى قۇجاتتاردى تەكسەرۋ بارىسىندا س. يسلاموۆتىڭ جۇرگىزۋشى كۋالىگى ۇيعىر اۋدانى سوتىنىڭ شەشىمىمەن 3 جىل مەرزىمگە، ياعني، 2018 جىلدىڭ 28 جەلتوقسانىنا دەيىن باسقارۋ قۇقىعىنان ايىرىلعانى انىقتالدى. وسىعان بايلانىستى س. يسلاموۆقا قاتىستى اكىمشىلىك قۇقىق بۇزۋشىلىق تۋرالى حاتتاما تولتىرىلعان.

ەڭ قىزىعى – س. يسلاموۆ ماسەلەسىنە وراي رەسپۋبليكالىق بۇقارالىق اقپارات قۇرالدارىندا دا بىرنەشە رەت ماتەريال جاريالانىپ، ونىڭ بۇنداي لاۋازىمدى قىزمەتكە لايىق ەمەس ەكەنى ايتىلسا دا، ەش ناتيجە بولماعان. بالكىم، ءتورتىنشى بيلىكتىڭ توتە جولداعان ساۋالىن توبەدەگىلەر تىڭدامادى، بالكىم، «كۇشتىنىڭ ارتى ديىرمەن تارتادى» دەگەن ماقالدىڭ اقيقاتىنان با ەدى، كىم ءبىلىپتى؟!

اگاراكي، ولاي بولسا، سوڭعى ۋاقىتتا ەل اۋزىندا جاتتالا باستاعان «ءبىزدىڭ سۇلتاننىڭ قولىندا اڭىزداعى سۇلەيمەن سۇلتاننىڭ جۇزىگى بار. سەبەبى، ونىڭ اماندىعىن اماندىقتىڭ ءوزى جاۋاپتى ەتكەن» دەگەن پىكىرگە حالىقتىڭ ءبىرجولا سەنۋىنە تۋرا كەلگەندەي؟..

                                                                   “The Qazaq Times”