يران ورمۋز بۇعازىن اقش-قا قارسى قارۋ رەتىندە قولدانباق

ەگەر ۋاشينگتون سانكتسيالىق قىسىمىن جالعاستىرا بەرەتىن بولسا، يران يسلام رەسپۋبليكاسى ورمۋز بۇعازىن جاۋىپ تاستاۋى مۇمكىن. بۇل تۋرالى يران پرەزيدەنتى حاسان رۋحاني NBC-گە بەرگەن سۇحباتىندا مالىمدەدى، - دەپ جازادى "dw.com/tr".

«بۇل — ەشقانداي دا ەسكەرتۋ ەمەس. بۇل — شىندىق. ەگەر پارسى شىعاناعىنىڭ تەڭىز جولى اشىق ءارى قاۋىپسىز قالۋى ءتيىس بولسا، وندا ول ءبارى ءۇشىن سونداي بولۋى كەرەك»، - دەگەن رۋحاني. بۇعان دەيىن دە حابارلاعانىمىزداي، يراننىڭ احۆاز قالاسىنداعى تەراكت ءۇشىن يران اقش پەن ءوزىنىڭ كورشىلەرىن، اتاپ ايتار بولساق ساۋد-ارابياسى، ءباا جانە باحرەين ەلدەرىن كىنالاعان ەدى. ال، ۋاشينگتون بولسا ءوز كەزەگىندە تەھرانعا تەرروريزمدى قارجىلاندىرادى دەگەن ايىپ تاققان بولاتىن. اقش-تىڭ يرانعا قارسى جاڭا سانكتسيالارىنان سوڭ تەھران امەريكالىق ساياساتقا قاتاڭ سىني مالىمدەمە جاساپ، جاۋاپ بەرگەن ەدى.

ەسكە سالايىق، ورمۋز بۇعازىنىڭ سولتۇستىك جاعالاۋى (ومان مەن پارسى شىعاناعىنىڭ اراسى) يرانعا، وڭتۇستىك جاعالاۋى — ءباا مەن ومانعا تيەسىلى. سونداي-اق، ستراتەگيالىق جانە ترانزيتتىك ۇلكەن ماڭىزعا يە اۋماق پارسى شىعاناعى ەلدەرىنەن جاپونياعا، اقش-قا جانە باتىس ەۋروپاعا مۇناي مەن گاز ەكسپورتتالاتىن بىردەن-ءبىر تەڭىز جولى.

“The Qazaq Times”