قىرعىزستان ىشكى ىستەر مينيسترلىگى ء(ىىم) اقش ەلشىلىگىنە مالىمەتتەر بەرگەن بۇرىنعى جانە قازىرگى قىزمەتكەرلەردىڭ سوتتالعانى جونىندەگى اقپاراتتى راستادى.

ءىىم ءباسپاسوز حاتشىسى باقىت سەيتوۆ جاۋاپقا تارتىلعاندار كەزىندە ءىىم-دە جۇمىس ىستەگەن دەيدى. «يا، ونىڭ بىرەۋى كەزىندە بىزدە ء(ىىم) قىزمەت ىستەگەن. كەيىننەن اقش ەلشىلىگىنە جۇمىسقا تۇرعان سياقتى. ونىڭ ءىىم-دە تانىستارى قالعان. سولاردان اقپارات الىپ وتىرعان. مەن مۇنى ءوز كوزىممەن كورگەم»، - دەپ اتاپ ءوتتى سەيتوۆ.

جوعارعى سوت ءىس ءبىرىنشى ماي اۋداندىق سوتىندا وتكەنىن، بىراق سوت شەشىمى مەملەكەتتىك قۇپيا رەتىندە جاريالانبايتىنىن حابارلادى. اقش ەلشىلىگى بولسا، بۇل مالىمەتكە بايلانىستى ازىرگە ەشقانداي تۇسىنىكتەمە بەرمەدى.

«دەلو №» گازەتىنىڭ 19 قىركۇيەكتەگى سانىندا «قىرعىزستان ءىىم وفيتسەرلەرى اقش ەلشىلىگى ءۇشىن تىڭشىلىقپەن اينالىسقان» دەگەن ماقالا جارىق كوردى. وندا قازىر اقش ەلشىلىگىندە كۇزەتتە جۇمىس ىستەيتىن ءىىم بۇرىنعى قىزمەتكەرلەرى سامات شەريپبەكوۆ پەن كۋماربەك چالدانباەۆ جانە ءىىم-ءنىڭ قازىرگى وفيتسەرلەرى ميرلان تويچيەۆ پەن ەميلبەك كاراچەۆ «شەتەلدىك ۇيىمعا اقپارات جيناپ وتىرعان» دەپ ايىپتالعاندىعى جازىلعان.

"The Qazaq Times"