اقش-قىتاي ساۋدا سوعىسىنىڭ جاڭا كەزەڭى باستالدى: قوس مەملەكەت ءبىر مەزەتتە ەكىجاقتى سالىق ەنگىزدى

اقش قىتايدان شىعارىلاتىن تاۋارلارعا سالىناتىن ون پايىزدىق سالىقتى كۇشىنە ەنگىزدى. ول 200 ملرد دوللار قۇرايدى. ال، قىتاي دا ءوز كەزەگىندە امەريكاعا قارسى جالپى كولەمى 60 ملرد. دوللارلىق سالىق سالدى، - دەپ حابارلايدى fr.euronews.com.

سونىمەن، اقش-تىڭ قىتايعا قارسى ساۋدا سوعىسىنىڭ جاڭا كەزەڭى باستالدى. «ەadaily.com» سايتى قىتايلىق اقپارات كوزدەرىنە سىلتەمە جاساپ، قحر-دا كەدەندىك سالىقتاردىڭ ەنگىزىلۋ ماسەلەسىنە قاتىستى بيلىكتىڭ ۇستانىمى جاريالانعانىن حابارلايدى. وندا، اق ءۇي تاراپىنان قىتايعا جاسالعان وسى جاڭا ساۋدا سوعىسى ەركىن ساۋدا جۇيەسىنە قاۋىپ ءتوندىرۋشى فاكتور دەپ اتالىپ، امەريكالىقتارمەن وتكىزىلەدى دەپ كۇتىلگەن كەلىسسوزدەردىڭ ءبارى جوققا شىعارىلعانى ايتىلعان. وسى سالىقتىڭ كەسىرىنەن قىتايدىڭ ءجىو ءبىر پايىزعا تومەندەيدى دەپ ەسەپتەيدى ساراپشىلار. ال، قىتاي بيلىگى ونى — 0,7 پايىز دەپ بولجاۋدا. الايدا، تاعى دا ساراپشىلاردىڭ پىكىرىنە سۇيەنسەك، بۇل سالىقتار بەيجىڭ ءۇشىن وڭايعا سوقپايدى. سەبەبى، اقش تاراپىنان ەنگىزىلگەن سالىقتار قىتايلىق ەكسپورتتىڭ جارتىسىنا جۋىعىن قامتيدى: ياعني، ەلەكترونيكا تاۋارلارىنان باستاپتۇرمىستىق حيميالارعا دەيىن، سونداي-اق، جيھازدان باستاپ بالىققا دەيىن سالىنعان. سونىمەن قاتار، كوپشىلىككە بەلگىلى ەكى دەرجاۆا دا وسىعان دەيىن 50 ملرد دوللار كولەمىندەگى تاۋارلارعا ەكىجاقتى سالىق ەنگىزگەن بولاتىن. سول كەزدە اقش قىتايعا سالىقتاردىڭ 267 ملرد دوللارلىق تاۋارلارعا دا تارالۋى مۇمكىن ەكەنىن ەسكەرتكەن ەدى.

“The Qazaq Times”