فوتو: كورنەكى سۋرەت

ەگەر، بۇگىن، ياعني 24  تامىزدا وتەتىن كەزدەسۋدە ەۋرووداق بوسقىندار ماسەلەسىنە قاتىستى يتالياعا كومەك كورسەتۋ ءۇشىن ناقتى شەشىم قابىلداماسا، «بەس جۇلدىز قوزعالىسى» يتاليانىڭ 20 ملرد ەۋرولىق سالىمىنا قاتىستى داۋىس بەرۋدەن باس تارتادى. بۇل تۋرالى اتالعان قوزعالىستىڭ ۆيتسە-پرەمەرى لۋيدجي دي مايو مالىمدەگەن، - دەپ جازادى avim.org.tr.

"كەزدەسۋ بارىسىندا Diciotti كەمەسى مەن يتالياعا كەلۋشى بوسقىندارعا قاتىستى ناقتى شەشىم قابىلدانۋى ءتيىس", - دەپ مالىمدەگەن دي مايو. بۇدان بۇرىن ەۋرووداقتىڭ يتالياعا بوسقىندار ماسەلەسىنە قاتىستى كومەگى جەتپەي جاتقانىن ايتىپ، پرەمەر-مينيستر دجۋزەپپە كونتە، ىشكى ىستەر ءمينيسترى، ۆيتسە-پرەمەر ماتتەو سالۆيني  جانە سىرتقى ىستەر ءمينيسترى ەنتسو مواۆەرو ميلانەزي دە مالىمدەمە جاساعان ەدى. سالۆيني ەۋرووداق بوسقىندار ماسەلەسىنە قاتىستى يتالياعا كومەك قولىن سوزباسا، وندا وزدەرىنىڭ زاڭسىز بوسقىندار تيەلگەن كەمەنى ليۆياعا قايتاراتىنىن ەسكەرتكەن بولاتىن. وسىنىڭ الدىندا دا حابارلانعانداي، يتاليالىق جاعالاۋ قىزمەتىنىڭ كەمەسى Diciotti 177 زاڭسىز بوسقىندى العان. الايدا، ولارعا ەۋرووداق وسى بوسقىنداردى قاي ەلگە جىبەرەتىنىن ناقتى شەشكەنگە دەيىن عانا ۋاقىتشا باسپانا بەرىلگەن. سونىمەن قاتار، وسىدان بۇرىن ەۋروپالىق بەس ەل ولاردى قابىلداۋعا دايىن ەكەندىكتەرىن حابارلاعانمەن، كەيىن ەو ەلدەرى بۇل شەشىمدەرىنەن باس تارتقان. ەۋرووداق زاڭىنا سايكەس،  وعان مۇشە-ەلدەر بوسقىنداردى قابىلداۋعا مىندەتتى سانالمايدى.

ءارى، يتاليانىڭ جاڭا ۇكىمەتى 2018 جىلدىڭ ماۋسىمىنان باستاپ، زاڭسىز بوسقىنداردى تاسيتىن ۇكىمەتتىك ەمەس ۇيىمداردىڭ كەمەلەرىنە ءوزىنىڭ پورتتارىنا كىرۋگە تىيىم سالعان.

“The Qazaq Times”