فوتو: trend.az

ساۋد-ارابياسى كاناداعا سالاتىن بارلىق ينۆەستيتسياسىن توقتاتىپ، كانادالىق ەلشىنى «پەرسونا نون-گراتا» دەپ جاريالادى. ساۋد-ارابياسىنىڭ مۇنداي قادامعا بارۋىنا ايەلدەردىڭ اۆتوكولىك جۇرگىزۋىنە بايلانىستى بيلىككە قارسى شىعۋشى بەلسەندىلەرىنىڭ تۇتقىندالۋىنا قاتىستى وتتاۆانىڭ قاتال سىن ايتۋى سەبەپ بولعان. بۇل تۋرالى ساۋديالىق «Saudi Press Agency» اقپاراتتىق اگەنتتىگى حابارلادى.

ەسكە سالايىق، وسى جىلدىڭ ماۋسىم ايىندا ساۋد-ارابياسى ساۋديالىق ايەلدەردىڭ اۆتوكولىك جۇرگىزۋلەرىنە سالىنعان تىيىمدى الىپ تاستاعان ەدى. ساۋديا بيلىگى وسى شەشىمىنەن از ۋاقىت بۇرىن اتالعان قۇقىققا قارسى شىعۋشى بىرنەشە بەلسەندىنى قاماۋعا العان بولاتىن. ەندى، وتكەن اپتانىڭ جۇماسىندا كانادانىڭ ءسىم ساۋد-ارابياسىن قۇقىق قورعاۋشىلاردى «تەز ارادا بوساتۋعا» شاقىرىپ، مينيسترلىك باسشىسى حريستيا فريلاند وسى وقيعاعا قاتتى الاڭدايتىنىن بىلدىرگەن ەدى.  وسىعان جاۋاپ رەتىندە ساۋد-ارابياسىنىڭ سىرتقى ىستەر مينيسترلىگى كانادا ەلدىڭ ىشكى ىستەرىنە ارالاسۋدا دەپ، قاتاڭ جاۋاپ جاساعان ەدى. «بۇل —  كورولدىكتىڭ  زاڭدارىن اياق استى ەتۋ، بۇعان كوز جۇمىپ قاراۋ مۇمكىن ەمەس. سونىمەن قاتار، بۇل — كورولدىكتىڭ ەگەمەندىگىن بۇزۋ بولىپ سانالادى. ءوزىنىڭ ۇزاق جىلعى تاريحى بويىنشا ساۋد-ارابياسى ەشقاشان وزدەرىنىڭ ىشكى ىستەرىنە بوتەن ەلدىڭ ارالاسۋىنا نەمەسە قانداي دا ءبىر مەملەكەتتىڭ بۇيرىق ەتۋىنە جول بەرمەگەن. كانادانىڭ بۇدان  كەيىن بىزگە ىشكى ىسىمىزگە باعىتتالعان  كەز كەلگەن قادامى ءبىزدىڭ دە كانادانىڭ ىشىكى ىستەرىنە ارالاسۋعا  بولاتىنىن بىلدىرەدى » ، - دەپ مالىمدەگەن ساۋد-ارابيا ءسىم.  وسىلاي مالىمدەمە جاساعان ساۋد-ارابياسىنىڭ سىرتقى ىستەر مينيسترلىگى كانادامەن اراداعى بارلىق ساۋدالىق جانە ينۆەستيتسيالىق وپەراتسيالاردى بۇعاتتاعانى تۋرالى حابارلاعان. سونىمەن قاتار، ساۋد-ارابياسى ءوزىنىڭ كاناداداعى ەلشىسىن كەرى قايتارىپ، كانادانىڭ ساۋد-ارابياسىنداعى ەلشىسىن «پەرسونا نون-گراتا» رەتىندە جاريالاعان. ەندى، كانادالىق ديپلومات ساۋد-ارابياسىنان 24 ساعات ىشىندە دەرەۋ كەتۋى ءتيىس.

“The Qazaq Times”