تۇركيا قارۋلى كۇشتەرى ۇلان-باتىر قالاسىندا موڭعوليا بيلىگىنىڭ رۇقساتىنسىز  ارنايى وپەراتسيا جاساماق بولعان.

«The New York Times»  باسىلىمىنىڭ مالىمەتىنشە، شىلدە ايىنىڭ 27-ءى كۇنى ۇلان-باتىر قالاسىندا تۇركيا ارنايى قىزمەت وكىلدەرى فەتۋللاح گۇلەن جاقتاستارىنىڭ ءبىرى ۆەيسەل اكچايدى ۇرلاپ الىپ كەتپەك بولعان. الدىن الا بولجام بويىنشا، تۇركيا اگەنتتەرى ۆەيسەل اكچايدى ءۇيىنىڭ الدىنان «Toyota» اۆتو كولىگىنە كۇشتەپ مىنگىزىپ، «شىنعىس حان» اتىنداعى حالىقارالىق اۋەجايدا كۇتىپ تۇرعان تۇركيا اۋە كۇشتەرىنە تيەسىلى «Flightradar -24» ۇشاعى ارقىلى ەلدەن الىپ شىقپاق بولعان.

ءدال وسى كۇنى موڭعوليا سىرتقى ىستەر مينيسترلىگى ۆەيسەل اكچايعا قاتىستى جاسالعان ارەكەتتى «موڭعوليا تاۋەلسىزدىگى مەن تۇتاستىعىنا نۇقسان كەلتىرۋ» دەپ باعالاعان. ال ەل ۇكىمەتى تۇركيا ۇشاعىنا اۋەگە كوتەرىلۋگە تىيىم سالعان.

ازىرگى تۇركيا بيلىگى اتالمىش ماسەلەگە بايلانىستى ەشقانداي رەسمي مالىمدەمە جاساماعان. ايتا كەتەتىن ءبىر جايت، بۇعان دەيىن رەسمي انكارا فەتۋللاح گۇلەننىڭ وزگە ەلدەردەگى جاقتاستارىن اتالمىش مەملەكەتتەردىڭ كەلىسىمى بويىنشا تۇركياعا ەكستراديتسيالايتىندىقتارىن مالىمدەگەن.

“The Qazaq Times”