قازاق دەپۋتاتى رەسەيلىك ارىپتەستەرىنە «اۋىزدارىنا اباي بولۋدى» ايتتى

قازاق مۇددەسى مەن مەملەكەتتىك تۇتاستىعىنا قاۋىپتى ءسوز بەن ارەكەتتەرگە باتىل ءۇن قاتاتىن دەپۋتاتتىڭ ءبىرى – ماۋلەن اشىمباەۆ. ماۋلەن ساعاتۇلى پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىن باسقارادى. بۇل دەپۋتاتتىڭ قىزمەتتىك تۇرعىداعى مىندەتى ەكەنى دە انىق، الايدا ونىڭ ازاماتتىق پوزيتسياسى دا وسى دەسەك قاتەلەسپەيمىز.

ماسەلە قايدان شىقتى؟ بيىلعى 26 قاڭتاردا رەسەي مەملەكەتتىك دۋماسىنىڭ تمد ىستەرى جونىندەگى كوميتەتىنىڭ مۇشەسى پاۆەل شپەروۆ مەملەكەتتىك دۋماداعى دوڭگەلەك ۇستەل، قازاقستانداعى ورىستاردى قورعايمىن جانە قازاقستان تەرريتورياسىن رەسەي جەرىنە قوسامىن دەگەن سىڭايدا پىكىر بىدىرگەن بولاتىن. وسىعان بايلانىستى، قازاقستان سىرتقى ىستەر مينيسترلىگى دە رەسەيلىك تاراپقا ءوز پوزيتسياسىن بىلدىرگەن.

بۇل تۋرالى كەشە پارلامەنت ءماجىلىسىنىڭ دەپۋتاتى ماۋلەن اشىمباەۆ تا قر، پارلامەنتى اتىنان ءوزىنىڭ نىق ۇستانىمىن ءبىلدىردى. ول قازاقستان مەن رەسەي دوستىق قارىم-قاتىناس جانە مەملەكەتتىك شەكارا كەلىسىمى نەگىزىندە بايلانىس ورناتقان جاقىن كورشى ەلدەر ەكەنىن ايتتى. ەكى ەلدىڭ ءتۇرلى ۇيىمدار توڭىرەگىندە تىعىز ارىپتەستىك ورناتىپ وتىرعانىن، مەملەكەت باسشىلارىنىڭ دا ءبىر-ءبىرىن قولداۋ، ءتۇسىنىسۋ باعىتىندا جۇمىس ىستەپ كەلە جاتقانىن ءبىلدىردى.

«بۇل پارلامەنتتىك جانە ۇكىمەتتىك دەڭگەيدەگى قارىم-قاتىناستارعا دا بايلانىستى. قازاقستان تاۋەلسىزدىگىنىڭ 25 جىلدىعىنا وراي، رەسەي مەملەكەتتىك دۋماسىنىڭ توراعاسى ۆ.ۆولانديننىڭ ءبىرىنشى رەت قازاقستانعا رەسمي ساپارمەن كەلۋى دە ەكى ەل اراسىنداعى جوعارى دەڭگەيدەگى قاتىناسقا جوعارى مازمۇن بەرەدى. سوندىقتان، قازاقستاننىڭ تەرريتوريالىق تۇتاستىعى تۋرالى مەملەكەتتىك دۋما دەپۋتاتى شپەروۆتىڭ ايتقانى اقىلعا سيىمسىز دۇنيە. ونىڭ بۇل پىكىرى ەكى ەلدىڭ تاتۋ كورشىلىك، دوستىق بايلانىسىنا، ارىپتەستىككە قۇرىلعان قازاقستان-رەسەي قاتىناسىنا ەش ساي كەلمەيدى» دەدى م.اشىمباەۆ.

ارى قاراي، ول قازاقستاننىڭ تاۋەلسىزدىگى مەن تەرريتوريالىق تۇتاستىعى ەش وزگەرمەيتىن قۇندىلىق ەكەنىن، ءبىزدىڭ شەكارامىزدىڭ حالىقارالىق كەلىسىمدەرگە ساي بەكىتىلىپ، تۇراقتالعانىن ايتتى. مەملەكەتتىك تۇتاستىعىمىزعا ەشكىمنىڭ كۇمان كەلتىرۋىنە جول بەرىلمەيدى دەدى. سوعان وراي، رەسەي مەملەكەتتىك دۋماسىنىڭ دەپۋتاتتارى بۇدان كەيىن قازاقستاننىڭ تاۋەلسىزدىگى مەن تەرريتوريالىق تۇتاستىعى تۋراسىنداعى سوزدەرىنە اباي بولۋىن، ەكى ەل اراسىنداعى بەرىك دوستىق پەن ىنتىماقتاستىق پرينسيپتەرىنەن اتتاپ كەتپەۋىن ەسكەرتتى.

بۇل – ماۋلەن اشىمباەۆتىڭ رەسەي دەپۋتاتتارىنا قاراتقان ءبىرىنشى پىكىرى ەمەس، ول كەزىندە رەسەي پارلامەنت وكىلدەرىنىڭ قازاقستانمەن ورتاق پارلامەنت قۇرۋ، شەكارانى ورتاق قورعاۋ سەكىلدى جىمىسقى ويلارىنا دا باتىل پوزيتسيا بىلدىرگەن ازامات.

اقتامبەردى اسپان

“The Qazaq Times”