Photو: Informburo.kz

ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ قازاقستاندا مەنينگوكوكتى ينفەكتسيانىڭ قاشان باسەڭدەيتىنىن ناقتى ايتا المادى. ۆەدومستۆو باسشىسى قاۋىپتى اۋرۋ ءبىر جىلدارى ءورشي تۇسەدى، ەندى بىردە قارقىنىن جوعالتادى. سوندىقتان ونىڭ ناقتى قاشان جويىلارىن ءدوپ باسىپ ايتا المايمىن دەدى.

"دەنساۋلىق ساقتاۋ مينيسترلىگى ساپالى مەديتسينالىق قىزمەت كورسەتىلۋىن عانا قاداعالايدى. ءبىز ۆيرۋستى ينفەكتسيانىڭ ناقتى قاشان جويىلارىن بىلمەيمىز. مەنىڭشە، ەلىمىزدە مەنينگيتكە شالدىققاندار سانى كوبەيمەسە، ازىرگە ازايمايدى. بىراق جۇرتتىڭ ۇرەيلەنۋىنە سەبەپ جوق. ويتكەنى، قازاقستاندا وسىدان 20 جىل بۇرىن مەنينگيتكە شالدىعىپ، كوز جۇمىپ جاتقاندار الدەقايدا كوپ ەدى " - دەدى، ءبىرتانوۆ.

مەنينگيت مىسىقتابانداپ ناۋقاستاردى شەتىنەن جالماپ جاتقاندا - ەلدىڭ دۇرلىكپەۋى مۇمكىن ەمەس سىندى. قاۋىپتى دەرت جاستى دا، جاسامىستى دا باۋداي تۇسىرۋدە. وسىعان قاراماستان مينيسترلىك ەلىمىزدە كارانتين جاريالاۋعا اسىقپايدى. ايتۋىلارىنشا، مەنينگيتتەن قازا تاپقاندار سانى 20 ادامنان اسپايىنشا جاعداي قالىپتى ءارى تۇراقتى سانالادى ەكەن.

سوندا مينيسترلىك قازا تاپقاندار سانى قاشان قالىپتى دەڭگەيدەن اسىپ كەتەر ەكەن دەپ، ءالىپتىڭ ارتىن باعىپ وتىرا بەرمەك پە؟ شەندىلەردىڭ مۇنىسىن قانشا تىرىسساق تا ۇقپاي-اق قويدىق...

“The Qazaq Times”