فوتو: liberation.fr

سۇرياداعى اراب تايپالارىنىڭ باسشىلارى امەريكالىق اسكەريلەردىڭ ءسۇريادان شىعارىلۋى تۋرالى باستاماعا قولداۋ كورسەتۋدە. ولار سونىمەن قاتار، شامداعى (داماسك) سوعىسقا بايلانىستى ءوز جاساقتارىن قۇراتىندىقتارى تۋرالى قاۋلى شىعاردى، دەپ حابارلايدى «lanouvellerepublique.fr».

الەپپو، ءار-راككا، ءال-حاساكا سىندى قالالارداعى 70-كە جۋىق تايپانىڭ جەتەكشەلەرى دەير حافەر قالاسىندا جيىن وتكىزگەن. جيىنعا كەلگەن اراب بەلسەندىلەرى شەتەلدىك باسقىنشىلىقتارعا قاتىستى پىكىرلەرىن ءبىلدىرىپ، اسىرەسە، اقش اسكەريلەرىنىڭ ءسۇريا تەرريتورياسىنان شىعارىلۋىن تالاپ ەتتى. ولار ءسۇريا جەرلەرى تولىق ازات ەتىلگەنگە دەيىن، ۇكىمەتكە قاراستى اراب اسكەرىنىڭ جانىنان شەتەلدىك كەز كەلگەن ينتەرۆەنتسياعا قارسى كۇرەسەتىن ۇلتتىق جاساق قۇرۋعا كەلىسكەن.

ارابيالىق اقپارات قۇرالدارى شام قالاسىنىڭ اسكەري ۆەدومستۆوسىنا سىلتەمە جاساي وتىرىپ، جاڭا قۇرىلعان باداۋيلىك اسكەري قۇرىلىمنىڭ ەلدىڭ شىعىس ايماقتارىندا ءسۇريا دەموكراتيالىق كۇشتەرى (سدك ) مەن امەريكالىق اسكەريلەرگە قارسى اسكەري قيمىل جۇرگىزەتىندەرى تۋرالى اقپارات تاراتۋدا. بۇدان بۇرىن دا ساۋد-ارابياسىنىڭ ەميسسارلارى سدك جەتەكشىلەرىمەن ءسۇريانىڭ شىعىس جانە سولتۇستىك ايماقتارىنداعى قالالاردىڭ اراب قارۋلى ۇيىمىنىڭ باقىلاۋىنا بەرىلۋىنە قاتىستى بىرقاتار كەلىسسوزدەر جۇرگىزگەن ەدى. ايتا كەتۋ كەرەك، نەگىزىنەن، ءال-باگگارا، فەداان، ادجەيدات، سباا سياقتى سۇرياداعى ءىرى كوشپەندى تايپالار ارابيادان تارالعان.

حالىقارالىق ساراپشىلاردىڭ پايىمداۋىنشا، سۇرياداعى باداۋيلىك شەيحتاردىڭ وسىنداي كەلىسسوزدەرى ءار-ريادتىڭ حابارىنسىز وتپەيتىنى انىق. بۇدان شىعاتىن قورىتىندى — تايپا باسشىلارىنىڭ وسى شەشىمى ساۋد-ارابياسىنىڭ اقش پەن سۇرياداعى وداقتارعا قارسى قانداي دا ءبىر ارەكەت باستاپ جاتقاندىقتارىن بىلدىرەدى. راسىمەن دە، ارابتاردان قۇرالعان جاڭا جاساق شامعا قىزمەت ەتەدى دەپ سەنۋ — نەگىزسىز. ونىڭ ۇستىنە، وتكەن سەنبى كۇنى شامنىڭ اسكەري رەسمي ۇيىمدارى تاراپىنان حابارلانعانداي، تايپا باسشىلارىنىڭ يراندىق-شيتتىك ءىرى قۇرىلىمنىڭ دەير-ءاز-زور قالاسىنىڭ باتىس ايماقتارىنا اۋىستىرىلۋىنا قالاي قارايتىنى دا بەلگىسىز. جاڭا كەلىپ تۇسكەن مالىمەتتەرگە قاراعاندا، شيتتىك جاساق ءسۇريا-اراب اسكەرىمەن بىرگە باديا ءال-شام قالاسىنداعى «يم»-ءنىڭ (دايش) قۇراماسىن تىقسىرىپ، قىسىمدى كۇشەيتۋدە.

 “The Qazaq Times”