نازارباەۆ قاۋىپسىزدىك كەڭەسىن ماڭگى باسقارماق

بۇگىن، مامىردىڭ 31-ءى كۇنى قازاقستان پارلامەنتى سەناتى پرەزيدەنت نۇرسۇلتان نازارباەۆقا قاۋىپسىزدىك كەڭەسىن ءومىر بويى باسقارۋ قۇقىعىن بەرەتىن زاڭ جوباسىن ماقۇلدادى. بۇل تۋرالى ازاتتىق راديوسى حابارلايدى.

“قازاقستان رەسپۋبليكاسىنىڭ قاۋىپسىزدىك كەڭەسى تۋرالى” زاڭ جوباسىن پارلامەنتتىڭ ەكى پالاتاسى قابىلداپ، پرەزيدەنت نۇرسۇلتان نازارباەۆقا جولدادى.

بۇعان دەيىن زاڭ جوباسىن دەپۋتاتتارعا تانىستىرعان قازاقستاننىڭ ادىلەت ءمينيسترى مارات بەكەتاەۆ ونىڭ قابىلدانۋى “قازاقستان قاۋىپسىزدىك كەڭەسىن ەلدىڭ ۇلتتىق قاۋىپسىزدىك پەن قورعانىس قابىلەتىن قامتاماسىز ەتۋشى ورگان رەتىندە تانۋعا” مۇمكىندىك بەرەتىنىن ايتقان.

زاڭ جوباسى بويىنشا قاۋىپسىزدىك كەڭەسى توراعاسىنا قاۋىپسىزدىك كەڭەسىن باسقارۋ، وتىرىستارى مەن جەدەل جينالىستارىن شاقىرۋ، قاۋىپسىزدىك كەڭەس تۋرالى جاعدايدى بەكىتۋ، سونىمەن بىرگە زاڭنامادا قاراستىرىلاتىن وزگە وكىلەتتەردى جۇزەگە اسىرۋ قۇقىعى بەرىلمەك.

ازىرشە كونسۋلتاتيۆتى-كەڭەسشى ورگان ستاتۋسىنداعى قاۋىپسىزدىك كەڭەسىنە كۇش قۇرىلىمدارى، ورتالىق جانە جەرگىلىكتى اتقارۋشى بيلىك ورگاندارىنىڭ جۇمىسىن ۇيلەستىرىپ، زاڭ جوبالارىن تالداۋ مەن زاڭداردىڭ ورىندالۋىن قاداعالاۋ فۋنكتسياسى جۇكتەلگەن.

“The Qazaq Times”