فوتو: france24.com/fr

بۇۇ-نىڭ ادام قۇقىقتارى جونىندەگى كەڭسەسى ساۋد-ارابيا بيلىگىنەن ناۆاف تالال راشيد حانزادا تۋرالى اقپارات بەرۋدى تالاپ ەتتى.  12 مامىردا كۋۆەيتتەن ساۋد-ارابياسىنا قايتارىلعان حانزادا تۋرالى ءالى كۇنگە دەيىن ەشقانداي اقپارات جوق. بۇل تۋرالى france24.com/fr اگەنتتىگى حابارلايدى. 

بۇۇ-نىڭ جوعارى كوميسسارى باسقارماسىنىڭ ءباسپاسوز حاتشىسى ليز تروسسەل بۇۇ ساۋد-ارابياسى حانزاداسىنىڭ بيلىك تاراپىنان ەشقانداي دا رەسمي مالىمدەمە جاسالماستان «ەش قيسىنسىز قاماۋعا الىنۋى» مەن «جوعالىپ كەتۋىنە» الاڭدايتىنىن ايتتى.

«بۇعان ءال-راشيد ديناستياسىنىڭ وكىلى ناۆاف تالاپ بين ءابدۋلازيز ءراشيدتىڭ ۇلى ناۆاف تالال راشيد حانزادانىڭ ءىز-ءتۇزسىز جوعالۋى دالەل بولا الادى»، -دەدى تروسسەل بۇۇ-نىڭ جەنەۆاداعى كەڭسەسىندە وتكەن كونفەرەنتسيادا. «بۇۇ ساۋد-ارابيا بيلىگىن حانزادانىڭ قايدا ەكەنى تۋرالى، سونىمەن قاتار ونىڭ قاماۋعا الىنىپ-الىنباعانى جونىندە، ەگەر تۇتقىندا بولسا وعان قانداي كىنا ارتىلعانى تۋرالى جەدەل تۇردە اقپارات بەرۋگە شاقىرادى»، - دەدى ول.

حالىقارالىق ساياساتكەرلەردىڭ پايىمداۋىنشا، ساۋد-ارابياسىندا مۇراگەر حانزادا مۇحاممەد بين سالماننىڭ  وپپوزيتسيونەرلەرىنە قارسى باستاعان وپەراتسيالارىنان كەيىن «ءىز-ءتۇزسىز كەتۋشى حانزادالار» ماسەلەسى حالىقارالىق قوعامنىڭ نازارىنا ىلىگۋدە. ەسكە سالايىق، ساۋد-ارابياسىندا حانزادا مۇحاممەد بين سالماننىڭ باستاماسىمەن ايەلدەردىڭ كولىك جۇرگىزۋلەرىنە سالىنعان تىيىمنىڭ كۇشىن جويۋى قاراستىرىلىپ، اقىرى ول زاڭ وسى جىلدىڭ 24 ماۋسىمىندا كۇشىنە مىنەدى دەپ كۇتىلگەن ەدى. وسى ايتىلعان مەرزىمگە از ۋاقىت قالعاندا ايەل قۇقىقتارىن جاقتاپ، قارسى شىعۋشى بەلسەندىلەر قاماۋعا الىنىپ، ەلدە حانزادا بين سالمانعا قارسى توڭكەرىس ارەكەتى بولۋى مۇمكىن دەگەن قاۋەسەت تاراعان ەدى. سودان بەرى، حانزادا بين سالمان «ەلدى وپپوزيتسيونەرلەردەن تازالاۋ» وپەراتسياسىن باستاپ كەتكەن بولاتىن.

ساۋديا پاتشالىعىنا قاتىستى تاعى ءبىر مالىمەتپەن بولىسەتىن بولساق، سوڭعى ءۇش جىلدا ەۋروپادا تۇرىپ جاتقان ءۇش بىردەي حانزادا ۇشتى-كۇيلى جوعالىپ، ال ءار-رياد ۇكىمەتىن سىناعان وزگە دە مۇراگەر حانزادالار ءوز ەرىكتەرىنەن تىس ساۋد-ارابياسىنا قايتارىلعانىنا قاتىستى ايعاقتار تابىلعان ەدى.

“The Qazaq Times”