سولتۇستىك كورەيا باسشىسى مەن دونالد ترامپ كەزدەسپەۋى مۇمكىن

ەگەر امەريكا پرەزيدەنتى دونالد ترامپ پحەنياننىڭ يادرولىق قارۋدان باس تارتۋىن تالاپ ەتۋىن توقتاتپاسا، كحدر باسشىسى اقش-پەن كەزدەسۋدەن باس تارتۋى مۇمكىن. بۇل تۋرالى بي-بي-سي اقپارات اگەنتتىگى حابارلايدى.

سولتۇستىككورەيالىق رەسمي جاڭالىقتار اگەنتتىگى تستاك كحدر-نىڭ سىرتقى ىستەر ءمينيسترىنىڭ وسىنداي مالىمدەمەسىن جاريالادى. اتالعان مالىمدەمەدە: «اقش يادرولىق قارۋدان باس تارتۋىمىزدى تالاپ ەتىپ، ءبىزدى تىعىرىققا تىرەۋدە. ءبىزدى مۇنداي كەلىسسوزدەر قىزىقتىرمايدى، سوندىقتان  اقش پەن كحدر-نىڭ اراسىنداعى الدا وتكىزىلەدى دەپ جوسپارلانعان تاريحي كەزدەسۋدى تاعى ءبىر ويلانىپ كورەمىز. سولتۇستىك كورەيا الدا وتەتىن سامميت كورەي جارتى ارالىنداعى جاعدايدى باسەڭدەتەدى دەپ كوپ ۇمىتتەندى. الايدا، كەزدەسۋ جاقىنداعان سايىن اقش ءتۇرلى مالىمدەمەلەر جاساپ، ءبىزدى ارانداتۋدا»، - دەلىنگەن.

سولتۇستىك كورەيا ليدەرى مەن اقش پرەزيدەنتى اراسىنداعى سامميت 12 ماۋسىم كۇنى سينگاپۋردە وتەدى دەپ جوسپارلانعان ەدى. بي-بي-سي اگەنتتىگىنىڭ وڭتۇستىك كورەياداعى ءتىلشىسى لورا بيكەردىڭ سوزىنشە، سولتۇستىككورەيالىق بيلىكتىڭ بۇل مالىمدەمەسى راسىمەن دە ترامپپەن ارادا جوسپارلانعان كەزدەسۋدىڭ بولماۋى مۇمكىن ەكەنىن بىلدىرەدى.

سونىمەن قاتار، كۇنى كەشە سايتىمىزدا وڭتۇستىك كورەيا مەن سولتۇستىك كورەيا باسشىلارىنىڭ تاعى دا كەزدەسۋگە شەشىم شىعارعاندارىن جازعان بولاتىنبىز. الايدا، بۇگىنگى حابارلارعا قاراعاندا، پحەنيان بۇل كەزدەسۋدەن دە باس تارتقان. ونىڭ اتالعان كەزدەسۋدەن نەگە اينىپ قالعانى تۋرالى ناقتى مالىمەت جوق.

“The Qazaq Times”