Егер Америка президенті Дональд Трамп Пхеньянның ядролық қарудан бас тартуын талап етуін тоқтатпаса, КХДР басшысы АҚШ-пен кездесуден бас тартуы мүмкін. Бұл туралы Би-Би-Си ақпарат агенттігі хабарлайды.

Солтүстіккореялық ресми жаңалықтар агенттігі ЦТАК КХДР-ның сыртқы істер министрінің осындай мәлімдемесін жариялады. Аталған мәлімдемеде: «АҚШ ядролық қарудан бас тартуымызды талап етіп, бізді тығырыққа тіреуде. Бізді мұндай келіссөздер қызықтырмайды, сондықтан  АҚШ пен КХДР-ның арасындағы алда өткізіледі деп жоспарланған тарихи кездесуді тағы бір ойланып көремізСолтүстік Корея алда өтетін саммит Корей жарты аралындағы жағдайды бәсеңдетеді деп көп үміттенді. Алайда, кездесу жақындаған сайын АҚШ түрлі мәлімдемелер жасап, бізді арандатуда», - делінген.

Солтүстік Корея лидері мен АҚШ президенті арасындағы саммит 12 маусым күні Сингапурде өтеді деп жоспарланған еді. Би-БИ-Си агенттігінің Оңтүстік Кореядағы тілшісі Лора Бикердің сөзінше, солтүстіккореялық биліктің бұл мәлімдемесі расымен де Трамппен арада жоспарланған кездесудің болмауы мүмкін екенін білдіреді.

Сонымен қатар, күні кеше сайтымызда Оңтүстік Корея мен Солтүстік Корея басшыларының тағы да кездесуге шешім шығарғандарын жазған болатынбыз. Алайда, бүгінгі хабарларға қарағанда, Пхеньян бұл кездесуден де бас тартқан. Оның аталған кездесуден неге айнып қалғаны туралы нақты мәлімет жоқ.

“The Qazaq Times”