ءسىم ورىنباسارى ەرجان اشىقباەۆ

نيۋ-يورك قالاسىندا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ بەيبىتشىلىك، قاۋىپسىزدىك جانە تۇراقتى دامۋدىڭ ءوزارا بايلانىسى ماسەلەلەرىنە ارنالعان بىرىككەن ۇلتتار ۇيىمىنىڭ بىرقاتار ءىس-شارالارىنا قاتىستى. بۇل تۋرالى ۆەدومستۆونىڭ رەسمي سايتىندا حابارلاندى. 

23 قاڭتاردا قازاقستان رەسپۋبليكاسىنىڭ تۇراقتى وكىلدىگى بەلارۋس جانە سۋرينام دەلەگاتسيالارىمەن، سونداي-اق بۇۇ دامۋ باعدارلاماسىمەن (بۇۇدب) بىرلەسىپ «ىلگەرىلەۋ جانە تۇراقتى دامۋ ماقساتىندا جاۋاپتى باسقارۋ، قارۋسىزدانۋ جانە تاراتپاۋ» اتتى ءىس-شارا ۇيىمداستىردى. بۇۇ باس حاتشىسىنىڭ كومەكشىسى جانە بۇۇدب-نىڭ ەۋروپا جانە ازيا بويىنشا وڭىرلىك بيۋرونىڭ ديرەكتورى دجيحان سۋلتانوگلۋ ءىس-شارانىڭ مودەراتورى بولدى. جيىن بارىسىندا بۇۇ باس اسسامبلەياسىنىڭ توراعاسى پيتەر تومسون، ەكوسوس توراعاسى فرەدەريك شاۆا، بۇۇ باس حاتشىسىنىڭ ەكونوميكالىق جانە الەۋمەتتىك ماسەلەلەر بويىنشا كومەكشىسى لەنني مونتەل، بەلارۋس رەسپۋبليكاسىنىڭ سىرتقى ىستەر ءمينيسترىنىڭ ورىنباسارى ۆالەنتين رىباكوۆ، بۇۇ جانىندا اككرەديتتەلگەن ديپلوماتيالىق ميسسيالاردىڭ جانە اكادەميالىق توپتاردىڭ وكىلدەرى ءسوز سويلەدى.

قازاقستاننىڭ سىرتقى ىستەر ءمينيسترىنىڭ ورىنباسارى ءوز سوزىندە قاتىسۋشىلاردىڭ نازارىن پرەزيدەنت نۇرسۇلتان نازارباەۆتىڭ حالىقارالىق باستامالارىنا، ونىڭ ىشىندە «الەم. XXI عاسىر» مانيفەسىنە جانە بۇۇ مۇشە مەملەكەتتەردىڭ جىل سايىنعى قورعانىس بيۋدجەتىنىڭ 1% ۇيىمنىڭ تۇراقتى دامۋ قورىنا ءبولۋ تۋرالى يدەياسىنا اۋداردى. سوڭعى باستاما قارجىلىق اعىمداردى قورعانىس كەشەنىنەن بۇۇ تۇراقتى دامۋ ماقساتتارىنا قايتا باعىتتاۋعا مۇمكىندىك بەرەدى.

24 قاڭتاردا ە. اشىقباەۆ بۇۇ باس اسسامبلەياسىنىڭ توراعاسى باستاما ەتكەن «بارلىعى ءۇشىن تۇراقتى الەمدى قۇرۋ: 2030 جىلعا دەيىنگى تۇراقتى دامۋدىڭ كۇن ءتارتىبى جانە بەيبىتشىلىكتى قولداۋ» تاقىرىبىنداعى جوعارى دەڭگەيلى سۇحباتتىڭ اشىلۋىنا قاتىستى. ءىس-شاراعا قاتىسقان بۇۇ باس حاتشىسى انتونيۋ گۋتەرريش، بۇۇ با توراعاسى پ. تومسون، ەكوسوس توراعاسى ف. شاۆا، بۇۇ حاتشىلىعى باسشىلىعىنىڭ لاۋازىمدى تۇلعالارى، ديپلوماتتار، ۇكىمەتتىك ەمەس ۇيىمداردىڭ، ازاماتتىق جانە اكادەميالىق قوعامداستىق وكىلدەرى بۇۇ جۇيەسى شەڭبەرىندە جانە ودان تىس پانارالىق سۇحباتتىڭ نەگىزىندە جاڭا يدەيالار مەن باستامالاردى ازىرلەۋ جانە ىلگەرىلەتۋ ارقىلى تۇراقتى دامۋدى ىسكە اسىرۋعا جانە بەيبىتشىلىكتى قولداۋ ماقساتىندا پىكىر الماستى.

ە. اشىقباەۆ قازاقستاننىڭ ۇلتتىق دەڭگەيدە بۇۇ-نىڭ تۇراقتى دامۋ سالاسىنداعى عالامدىق كۇن ءتارتىبىن ءىس جۇزىندە جۇزەگە اسىرۋ بويىنشا اتقارىپ وتىرعان ءىس-شارالارى، سونىڭ ىشىندە ەلىمىزدىڭ حالىقارالىق كەلىسىلگەن مىندەتتەمەلەرگە بەيىلدىگى تۋرالى قر پارلامەنتى سەناتىنىڭ مالىمدەمەسى تۋرالى اقپاراتتاندىردى.

سونىمەن قوسا، ە. اشىقباەۆ بەلارۋس سىرتقى ىستەر ءمينيسترىنىڭ ورىنباسارى ۆ. رىباكوۆپەن ەكىجاقتى كەزدەسۋ وتكىزدى.

«The Qazaq Times»