قىتاي بيلىگى مۇسىلمانداردىڭ قاجىلىق ساپارىن ودان سايىن قيىنداتتى

قىتايداعى مۇسىلماندار قاجىلىق ساپارعا اتتانباس بۇرىن كوممۋنيستتىك پارتيانىڭ الدىندا انت بەرۋگە مىندەتتەلدى.  بۇل تۋرالى Business Insider اقپاراتتىق سايتى حابارلادى. 

اتالعان اقپارات كوزىنىڭ حابارلاۋىنشا، شىڭجاڭ ايماعىنىڭ تۇرعىندارى قاجىلىق پارىزدارىن وتەۋگە بارماي تۇرىپ جاس مولشەرلەرى مەن جۇمىس ورىندارىن،  ماتەريالدىق جاعدايلارىن كورسەتىپ، ارنايى سايتقا تىركەلۋلەرى ءتيىس. ءدىني پارىزدان وتەمەك بولعان مۇسىلماندارعا بۇدان وزگە دە تالاپتار كۇشەيتىلگەن. ايتالىق، قاجىلىققا بارۋشىلاردىڭ جاسى 50-70 جاس ارالىعىن قامتۋ كەرەك ءارى  ءۇرىمجىنىڭ كەم دەگەندە 5 جىل تۇراقتى تۇرعىنى بولۋلارى ءتيىس. "وسىنداي تالاپتارعا سايكەس كەلەتىن مۇسىلماندار عانا قىتاي كوممۋنيستىك پارتياسىنا شىنايى بەرىلگەندىكتەرىن راستاپ، ينتەرنەت ارقىلى ساۋالناما تولتىرا الادى", دەپ حابارلايدى Business Insider اقپاراتتىق سايتى.

ايتا كەتۋ كەرەك، قىتاي بيلىگى جىل سايىن قاجىلىققا باراتىن مۇسىلماندارعا قاتىستى مونيتورينگ جۇرگىزىپ كەلەدى ەكەن.  Human Rights Watch (حيۋمان رايتس ۆوتچ) حالىقارالىق قۇقىق قورعاۋ ۇيىمىنىڭ پىكىرىنشە، قىتايلىق بيلىك قۇرىلىمدارى مۇسىلمانداردىڭ قاجىلىق ساپارىنا «ساياسي ديۆەرسيالىق ارەكەتتەرىن جاسىرۋ» ماقساتىندا عانا جول بەرىپ كەلەدى دەپ ەسەپتەيدى.

شىنجاڭنىڭ قازىرگى ساياسي جاعدايى تىم كۇردەلى. ونداعى ءدىن مەن ەتنيكالىق ازشىلىق قاۋىمعا جاسالىپ جاتقان قىسىمدار تۋرالى الەم اقپارات كەڭىستىگى حاباردار. جوعارىداعىداي ۇلتتاردىڭ ءدىني سەنىم قۇقىعىن بۇزۋ ارەكەتتەرى ءبىر عانا ۇيعىر نەمەسە دۇنگەندەرگە عانا ەمەس، ونداعى قازاق قانداستارىمىزعا دا باعىتتالۋدا. ادامداردىڭ بوستاندىعى مەن قۇقىعىن قورعاۋ تانىمى جوعارىلاعان قازىرگى زاماندا، قىتاي بيلىگىنىڭ بۇل قادامدارى الەم ەلدەرىنىڭ الاڭداۋشىلىعىن تۋدىرىپ وتىر.

“The Qazaq Times”