پۋتين مەن ەردوعان انكارادا نە تالقىلاماق؟

تۇركيا پرەزيدەنتى رەجەپ تايىپ ەردوعان مەن رەسەي باسشىسى ۆلاديمير ءپۋتيننىڭ بۇگىن، ياعني 3-ساۋىردە انكارادا رەسمي كەزدەسۋ وتكىزەتىنىن بۇدان بۇرىن دا حابارلاعانبىز.  4-ساۋىردە يران باسشىسى حاسان رۋحانيمەن دە كەزدەسۋلەرى جوسپارلانعان پۋتين مەن ەردوعاننىڭ وسى جيىننان ءبىر كۇن بۇرىن  كەزدەسكەندە نە تالقىلايتىندارى كوپشىلىكتى قىزىقتىرعانى راس.

وسىعان بايلانىستى "Twitter" الەۋمەتتىك جەلىسىندە جازبامەن بولىسكەن ەردوعان: "رەسەي پرەزيدەنتى، قۇرمەتتى دوسىم ۆلاديمير پۋتينمەن بىرگە تۇركيا مەن تۇرىك-ورىس قارىم-قاتىناسىنىڭ كەلەشەگى ءۇشىن ماڭىزدى قادام بولىپ سانالاتىن 20 ملرد. دوللارلىق ينۆەستيتسيا "اككۋيۋ" اتوم ەلەكتر ستانتسياسىنىڭ نەگىزىن قالايمىز", - دەدى.

نەگىزىندە، "اككۋيۋ" اتوم ەلەكتر ستانتسياسى ءۇشىن ۇكىمەتارالىق كەلىسىمشارتقا 2010 جىلى قول قويىلعان ەدى. ەلەكتر ستانتسياسىنىڭ ءبىرىنشى رەاكتورى 2023 جىلى ىسكە قوسىلادى دەپ جوسپارلانۋدا. ال باسقا رەاكتورلاردىڭ اراعا بىرنەشە جىل سالىپ ىسكە قوسىلاتىنى بەلگىلى.

وسىلايشا، ءاربىرىنىڭ سىيىمدىلىعى 200 مىڭ مۆت (مەگا ۆاتت) بولاتىن 4 رەاكتوردان تۇراتىن ەلەكتر ستانتسياسىنىڭ 2026 جىلى تولىقتاي اياقتالاتىنى كوزدەلۋدە. شامامەن 20 ملرد. دوللار جۇمسالاتىن وسى جوبانىڭ تۇركيانىڭ بۇكىل ەلەكتر ەنەرگيا قاجەتتىلىگىنىڭ 7.7 پايىزىن قامتيتىنى جوسپارلانۋدا.

“The Qazaq Times”