فوتو: panarmenian.net

تۇركيا بيلىگى فەتحۋللاح گۇلەندى تۇتقىنداۋعا بايلانىستى شەشىم شىعاردى.

Haberturk تەلەارناسىنىڭ حابارلاۋىنشا، تۇركيا بيلىگى ءدىني كوسەم فەتحۋللاح گۇلەن مەن ونىڭ جەتى جاقتاسىن تۇتقىنداۋعا بايلانىستى شەشىم شىعارعان. ولارعا «تۇركيانىڭ كونستيتۋتسيالىق تۇراقتىلىعىن بۇزباق بولدى» جانە «2016 جىلدىڭ 19 جەلتوقسان كۇنى انكارا قالاسىندا رەسەي ەلشىسى اندرەي كارلوۆقا جاسالعان شابۋىلدى ۇيىمداستىردى» دەگەن ايىپ تاعىلعان.

فەتحۋللاح گۇلەن «حيزمەت» يسلام كوزعالىسىنىڭ ۋاعىزداۋشىسى جانە كوشباسشىسى. رەجەپ تايىپ ەردوعان ۇكىمەتى اتالمىش ۇيىمعا «FETO» دەگەن ات بەرگەن. 1999 جىلدان بەرى اقش-تا تۇراتىن فەتحۋللاح گۇلەنگە «تۇركيادا 2016 جىلى مەملەكەتتىك توڭكەرىس جاساماقشى بولدى» دەگەن ايىپ تاعىلعان. ەل بيلىگى اقش-تان ونى بىرنەشە رەت تۇركياعا ەكستراديتسيالاۋدى سۇراعان. بىراق اقش رەسمي انكارانىڭ بۇل ءوتىنىشىن ورىنداماعان. ال گۇلەننىڭ ءوزى تۇركيا بيلىگى تاققان ايىپتى نەگىزسىز دەپ ەسەپتەيدى.

“The Qazaq Times”