تاسماعامبەتوۆ احمەت بايتۇرسىنۇلىنىڭ مۋزەي ۇيىنە ۇلتتىق مارتەبە بەرۋدى تاپسىردى

تاسماعامبەتوۆ تاريح جانە مادەنيەت ەسكەرتكىشى سانالاتىن مۋزەي ءۇيىنىڭ جىلدار بويى قوردالانعان ماسەلەلەرىنىڭ شەشىلۋىنە مۇرىندىق بولماق.

احمەت بايتۇرسىنۇلى مۋزەي ءۇيىنىڭ ديرەكتورى رايحان ساحىبەكقىزى ۆيتسە-پرەمەر يمانعالي تاسماعامبەتوۆتى مۋزەي جۇمىسىمەن جانە اقىننىڭ جادىگەرلەرىمەن تانىستىرا وتىرىپ، تۇيتكىلدى ماسەلەلەردىڭ بار ەكەنىن جەتكىزدى.

ۆيتسە-پرەمەر ءوز كەزەگىندە الاش زيالىلارىنىڭ قۇندى مۇرالارىن جيناقتاپ، ساقتاۋعا كەلگەندە ايانباي ەڭبەك ەتۋ قاجەت ەكەنىن ايتا وتىرا، وسى دۇنيەلەردىڭ قۇندىلىعىنا دا ەرەكشە توقتالدى.

"1934-1937 جىلدارى اقىن تۇرعان وسىناۋ كيەلى شاڭىراق - تاريح پەن تاعىلىمنىڭ ورداسى. بۇل ءۇيدىڭ ءاربىر كىرپىشى مەن بۇرىشى احاڭنىڭ قيىن دا قاسىرەتتى تاعدىرىنان سىر شەرتەدى. سوندىقتان، ءبىز بۇل تاريحي ەسكەرتكىشتى ساقتاۋعا، ونىڭ ءبىلىم مەن عىلىمنىڭ، ءتالىم مەن تاربيەنىڭ ورداسى رەتىندە دامىتۋعا ءتيىسپىز", - دەدى يمانعالي تاسماعامبەتوۆ.

ۇكىمەت تاراپىنان قايراتكەردىڭ عىلىمي ەڭبەكتەرىن زەردەلەۋدى جەتىلدىرۋ ماقساتىندا قر پرەمەر-ءمينيسترىنىڭ ورىنباسارى يمانعالي تاسماعامبەتوۆ مۋزەي ۇلتتىق مارتەبەسىن بەرۋ، احمەت بايتۇرسىنۇلى شىعارمالارىنىڭ 10 تومدىعىن شىعارۋ جانە دەرەكتى فيلم ءتۇسىرۋ جونىندە تاپسىرما بەردى. قويىلعان مىندەتتەردى جۇزەگە اسىرۋ ءۇشىن كەلەسى اپتادا استانادا ارنايى كەڭەس وتكىزىلمەك.

ايتا كەتەيىك، 1934-1937 جىلدار ارالىعىندا احمەت بايتۇرسىنوۆ تۇرعان ءۇي مۋزەي رەتىندە 1998 جىلى اقىننىڭ 125 جىلدىق مەرەيتويى قارساڭىندا رەسمي تۇردە اشىلعان. سونىمەن قاتار، بيىل الاش قوزعالىسىنىڭ قۇرىلعانىنا 100 جىل تولادى.

“The Qazaq Times”