وزبەكستاندا كاسىپكەرلەردىڭ قارجى ەسەپتەرىنە تەكسەرۋ جۇرگىزۋگە ەكى جىلعا تىيىم سالىندى.

«وزبەكستان 24» تەلەارناسىنىڭ حابارلاۋىنشا، ەل پرەزيدەنتى شاۆكات ميرزيەەۆ وزبەكستان اۋماعىندا جۇمىس ىستەيتىن بيزنەسمەندەر مەن كاسىپورىنداردىڭ قارجى ەسەپتەرىنە تەكسەرۋ جۇرگىزۋگە ەكى جىلعا موراتوري جاريالاۋعا بايلانىستى قۇجاتقا قول قويعان. ول اتالمىش زاڭ جوباسىن جەلتوقسان ايىنىڭ سوڭىندا دەپۋتاتتارمەن كەزدەسۋىندە پارلامەنتتىڭ قوس پالاتاسىنا ۇسىنعان. بۇعان دەيىن شاۆكات  ميرزيەەۆ 2016 جىلدىڭ قازان ايىندا 2017 جىلدىڭ 1 قاڭتارىنان باستاپ كاسىپكەرلىك سۋبەكتىلەردى جوسپاردان تىس تەكسەرۋگە تىيىم سالاتىن قاۋلى قابىلداعان بولاتىن.

جالپى شاۆكات ميرزيەەۆ بيلىك باسىنا كەلگەلى بەرى وزبەكستاندا بيزنەسمەندەرگە جۇمىس ىستەۋگە قولايلى جاعدايلار جاسالۋدا. 20 جىلدىق ۇزىلىستەن كەيىن وزبەكستانعا يسلام كارىموۆتىڭ كەزىندە ەلدەن قۋىلعان تۇركيالىق كاسىپكەرلەر قايتىپ ورالۋدا. بيلىك باسىنا كەلگەن قىسقا ۋاقىت ارالىعىندا ميرزيەەۆ قازاقستان، رەسەي، وڭتۇستىك كورەيا، تۇركياعا رەسمي ءىس-ساپارمەن بارىپ، بىرقاتار ساۋدا-ەكونوميكالىق قۇجاتتارعا قول قويعان. ناتيجەسىندە وزبەكستان كولىك قۇراستىرۋشى كاسىپورىندارى وڭتۇستىك كورەيا مەن تۇركيا كولىك وندىرۋشىلەرىمەن بىرىگىپ ەل اۋماعىندا اۆتوكولىك قۇراستىراتىن زاۋىت اشۋعا مۇمكىندىك العان.

“The Qazaq Times”