2017 جىلى سولتۇستىك كورەيا ۇشىرعان زىمىرانداردىڭ ءبىرى توكچحون قالاسىنا قۇلاعان – دەپ حابارلايدى "The Diplomat" گازەتى.

باسىلىم مالىمەتىنشە، سولتۇستىك كورەيانىڭ 2017 جىلدىڭ 29 ساۋىرىندە ۇشىرعان حۆوسون-12 زىمىرانىنىڭ قالدىقتارى 237 مىڭ تۇرعىنى بار توكچحون قالاسىنا قۇلاعان. سالدارىنان شاھارداعى اۋىل شارۋاشىلىعى مەن جەڭىل ونەركاسىپكە ارنالعان بىرنەشە عيمارات پايدالانۋعا جارامسىز بولىپ قالعان. زىمىران قالدىقتارى تۇندە قۇلاعاندىقتان ادام شىعىنى بولماعان.

ەستەرىڭىزگە سالايىق، وتكەن جىلدىڭ ءساۋىر ايىندا سولتۇستىك كورەيا ءوزىنىڭ كەزەكتى قىسقا قاشىقتىقتاعى حۆوسون-12 زىمىرانىن سىناقتان وتكىزگەن بولاتىن. كەيىننەن باق بەتتەرىندە حۆوسون-12 زىمىرانىنىڭ اۋەگە كوتەرىلگەن بەتتە جارىلىپ كەتكەندىگى ايتىلعان. بىراق ول كەزدە زىمىران قالدىقتارىنىڭ قانداي دا ءبىر ەلدى مەكەنگە قۇلاعاندىعى جايىندا ەشقانداي اقپارات تاراماعان.

“The Qazaq Times”