سولتۇستىك كورەيا ۇكىمەت عيماراتتارىن قامتىعان 15 نىسانعا شابۋىل جاساۋى مۇمكىن

سولتۇستىك كورەيا 15 شابۋىل نىسانىن جوسپارعا الىپ وتىر، ولاردىڭ اراسىندا استانالار مەن ۇكىمەت عيماراتتارى دا بار دەپ مالىمدەدى ەو-نىڭ سىرتقى بايلانىستار كوميسسياسى جاريالاعان جاڭا ەسەپتە. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلادى.

سولتۇستىك كورەيانىڭ ەڭ جوعارى باسشىسى كيم جوڭ ۋننىڭ «زىمىران شابۋىلىن جاسايمىن» دەپ  قورقىتۋىنىڭ استارىندا، ونىڭ نىساناعا الىپ وتىرعان جوسپارلارى دا اشكەرەلەنگەنىن ايتادى اتالعان ەسەپتە. ۇلىبريتانيانىڭ «Daily Mail» باسىلىمى دا كحدر باسشىسىنىڭ كەيبىر نىسانداردى انىقتاپ، زىمىران شابۋىلىن جاساۋدى جوسپارلاپ وتىرعانىن جازعان.

بۇل حابارداعى مالىمەتتەرگە سەنسەك، سولتۇستىك كورەيانىڭ زىمىران شابۋىل نىساناسىندا پەنتاگون، اق ءۇي، مانحەتتەن، گۋام، سەۋل، بۋسان، وكيناۆا، توكيو، كيوتو قاتارلى ۇكىمەت عيماراتتارى مەن قالالار بار.

دەگەنمەن، بۇل مالىمەتتەردىڭ دۇرىستىعى تولىق دالەلدەنبەسە كەرەك. جاقىندا عانا كورەي تۇبەگىندەگى جاڭا ديپلوماتيالىق وزگەرىستەر بولىپ، تاراپتاردىڭ كەلىسسوز جۇرگىزۋىنەن از بولسا دا ءۇمىت شىراعى جانعان بولاتىن. دەگەنمەن، سولتۇستىك كورەيانىڭ كەلەسى قادامىن انىق بولجاپ ايتۋ قيىن.

“The Qazaq Times”