ساۋد ارابياسى مەن يران ورتا شىعىستى جاڭا قاقتىعىسقا باستادى

ورتا شىعىستاعى ەكى ۇلكەن باسەكەلەس ەلدەر يران مەن ساۋد ارابياسى اراسىنداعى شيەلەنىستىڭ ورشۋىنە بايلانىستى، ەكى كۇن بۇرىن يران پرەزيدەنتى حاسان رۋحاني ساۋد ارابياسىنا قاتاڭ ەسكەرتۋ جاسادى. ول ساۋد جۇرتىنا وتپەن ويناماۋعا كەڭەس بەرگەن ەدى. بۇل تۋرالى «شينحۋانىڭ» رەسمي سايتى حابارلادى.

فرانتسيانىڭ AFP تاراتقان حابارلارعا قاراعاندا، تەھراننىڭ قولداۋىمەن يەمەندەگى  بۇلىكشىل كۇشتەر ريادقا قارا زىمىران اتتقاننان كەيىن، ارابياسىنىڭ تاق مۇراگەرى مۇحاممەد بين سالمان «بۇل يراننىڭ ساۋد ارابياسىنا اشىق سوعىس جاريالاۋى» دەپ باعالادى.

يران پرەزيدەنتى حاسان رۋحاني مەملەكەتتىك تەلەارنادا سويلەگەن سوزىندە ساۋد ارابياسىنا قاراتا: «سەندەر يراننىڭ وڭىردەگى قۋاتى مەن ىقپالىن انىق بىلەسىڭدەر، ول سەندەردىڭ وڭىردەگى جاساي الماعان مارتەبەلەرىڭنەن الدە قايدا كۇشتى. سەندەر ەشتەڭە دە ەمەسسىڭدەر!»، – دەپ ءزىلدى سوزدەر ارناعان ەدى. ول تاعى سوزىندە: «قۇراما شتات پەن ونىڭ وداقتاستارى بىزبەن كۇرەسۋ ءۇشىن ءار ءتۇرلى تاسىلدەردى جۇمىلدىردى، بىراق ەشتەڭە دە جاساي العان جوق»، – دەدى. ونىڭ بۇنداعى ايتىپ وتىرعانى 1980 جىلدارى يراكتىڭ باتىس جانە اراب ەلدەرىنىڭ قولداۋىمەن جاڭادان قۇرىلعان يران يسلام رەسپۋبليكاسىنا قاراتا اشقان سوعىسى. شىعاناق سوعىسى دەپ اتالاتىن بۇل قاقتىعىس 8 جىلدان كەيىن اياقتالعان ەدى.

يران پرەزيدەنتىنىڭ سوزىندە: «ەگەر سەندەر يراندى دوس دەپ قاراماساڭدار، وندا اقش پەن ەۆرەي رەجيمى سەندەرگە دوس بولعانى. سەندەر ستراتەگيالىق جانە ولشەمدىك تۇرعىدا قاتەلەسىپ تۇرسىڭدار»، – دەدى. ونىڭ بۇل ءسوزى ءيزرايلدىڭ پرەمەر-ءمينيسترى بينيامين نەتانياحۋدىڭ جاقىندا جاساعان بايانداماسىندا ايتىلعان: «يراننىڭ «قاۋىپ-قاتەرى» تۋرالى سوڭعى ەسكەرتۋلەر يزرايل مەن اراب كورشىلەرى اراسىندا بۇرىن-سوڭدى بولماعان تىعىز قارىم-قاتىناسقا اكەلدى»، – دەگەن سوزىنە قاراتا ايتىلدى.

ەكى ەل ۇكىمەتىنىڭ بۇل تەكە-تىرەسى ورتا-شىعىس ايماعىندا جاڭا قاقتىعىسقا جول اشۋدا. يران پرەزيدەنتىنىڭ بۇل پىكىرلەرى شىن مانىسىندە سوعىس اشۋ الدىنداعى ۇندەۋگە كوبىرەك ۇقسايدى. يران مەن ساۋد ارابياسى وڭىردە رەسەي مەن اقش-تى ارقا سۇيەر ەتكەن جاڭا مايداندى اشقالى تۇر.

“The Qazaq Times”