شەتەلدىك ينۆەستورلارعا تولەم تولەۋ سالدارىنان ينۆەستيتسيالىق كىرىس ازايعان

قازاقستاندا تاۋارلار ەكسپورتى 2016 جىلعى 9 ايداعى ۇقساس كورسەتكىشپەن سالىستىرعاندا 31,1%-عا نەمەسە 8,3 ملرد اقش دوللارىنا ۇلعايىپ، 35,1 ملرد اقش دوللارىن قۇرادى. قر ۇلتتىق بانكىنىڭ مالىمەتىنشە،  مۇناي جانە گاز كوندەنساتى ەكسپورتىنىڭ قۇنى 36,6%-عا، قارا جانە ءتۇستى مەتالدار ەكسپورتى تيىسىنشە 59,1%-عا جانە 20,9%-عا ءوستى.

تاۋارلار يمپورتى 15,6%-عا ۇلعايىپ، 23,1 ملرد اقش دوللارى بولدى. يمپورتتىڭ ءوسىمى نەگىزگى تاۋار نومەنكلاتۋراسىنىڭ بارلىق توپتارى بويىنشا بولدى. ەڭ كوپ ۇلعايۋ ازىق-تۇلىككە جاتپايتىن تۇتىنۋ تاۋارلارىن جانە ارالىق ونەركاسىپتىك تۇتىنۋ تاۋارلارىن اكەلۋ بويىنشا ورىن الدى. ناتيجەسىندە ساۋدا بالانسىنىڭ وڭ سالدوسى 77%-عا ءوسىپ، 12 ملرد. اقش دوللارى بولدى.

شەتەلدىك تىكەلەي ينۆەستورلارعا كىرىستەردى تولەۋ 1,5 ەسەگە ءوسۋى سالدارىنان ينۆەستيتسيالىق كىرىستەر بالانسىنىڭ تەرىس سالدوسى 2017 جىلعى 9 ايدا 12,3 ملرد اقش دوللارىن قۇرادى. شەتەلدىك تىكەلەي ينۆەستورلار بۇل كىرىستەردىڭ جارتىسىنان استامىن قازاقستانداعى ەنشىلەس كاسىپورىندارىنا
قايتا ينۆەستيتسيالادى.

قارجى شوتى بويىنشا كاپيتالدىڭ تازا اكەلىنۋى (ۇلتتىق بانكتىڭ رەزەرۆتىك اكتيۆتەرىمەن وپەراتسيالاردى قوسپاعاندا) الدىن الا باعالاۋ بويىنشا 6,6 ملرد اقش دوللارىن قۇرادى.

ۇلتتىق بانكتىڭ مالىمەتىنشە، شەتەلدىك تىكەلەي ينۆەستيتسيالار (شتي) بويىنشا كاپيتالدىڭ تازا اكەلىنۋى 3,3 ملرد بولعان. قازاقستاندىق كاسىپورىندار اعىمداعى جىلعى 3-توقساندا جۇرگىزگەن، ۇلەستەس تۇلعالار الدىنداعى فيرماارالىق بەرەشەكتى وتەۋ بويىنشا ايتارلىقتاي تولەمدەر شتي تازا اكەلىنۋىنىڭ قىسقارۋىنا ىقپال ەتتى.

پورتفەلدىك ينۆەستيتسيالار بويىنشا كاپيتالدىڭ تازا اكەلىنۋى 8,4 ملرد. دوللار بولدى، بۇل رەزيدەنتتەردىڭ شەتەلدىك باعالى قاعازدارعا ورنالاستىرىلعان اكتيۆتەرىنىڭ تومەندەۋى، سونداي-اق بانكتىك ەمەس سەكتوردىڭ كاپيتالدىڭ حالىقارالىق نارىقتارىندا ەۋرووبليگاتسيالار
شىعارۋى ەسەبىنەن بولدى.

باسقا ينۆەستيتسيالار بويىنشا قارجى رەسۋرستارىنىڭ ەلدەن اكەتىلۋى كوپ جاعدايدا رەزيدەنتتەردىڭ شەتەلدىك شوتتارداعى قىسقا مەرزىمدى اكتيۆتەرىنىڭ وسۋىنە بايلانىستى بولدى.

رەزەرۆتىك اكتيۆتەر (قر ۇلتتىق قورىنىڭ اكتيۆتەرىن ەسەپتەمەگەندە) 2017 جىلعى 1 قازانداعى جاعداي بويىنشا 32,2 ملرد اقش دوللارىنا (جىل باسىندا 29,5 ملرد اقش دولل) باعالاندى، بۇل قازاقستاندىق تاۋارلار مەن قىزمەتتەر يمپورتىن 9,1 اي قارجىلاندىرۋدى قامتاماسىز ەتەدى.

“The Qazaq Times”