ساۋد ارابياسىنىڭ حانزاداسى كونفەرەنتسيادا. فوتو: The Express Tribune.

الەم اقپارات قۇرالدارى ساۋد ارابياسى روبوتتاردىڭ  «ازاماتتىق قۇقىعىن»  قورعايتىن تۇڭعىش مەملەكەت بولعانىن حابارلاۋدا. بۇل تۋرالى «شينحۋانىڭ» رەسمي سايتى جازدى. 

ۇلىبريتانيا «Daily Mirror» (كۇندەلىكتى اينا) باسىلىمىنىڭ رەسمي سايتىنىڭ حابارلاۋىنشا، ساۋد ارابياسى استاناسى ەر-ريادتا وتكەن  «بولاشاق يننوۆاتسياسى» ماجىلىسىندە روبوتتاردىڭ قۇقىقتارى قورعالاتىنى تۋرالى جاڭا ەرەجەنى جاريا ەتكەن.  زاڭ بويىنشا، ازاماتتار روبوتتاردىڭ جۇمىسىنا كەدەرگى كەلتىرسە، ونى قۋات كوزىنەن اجىراتىپ تاستاسا نەمەسە وشىرسە زاڭدىق جاۋاپكەرشىلىك ارقالايدى. جاڭا زاڭدا قۇلتەمىرلەردىڭ (روبوتتاردىڭ) وزگە قانداي قۇقىقتارى قورعالعانى انىق ايتىلماعان.

ادامدارمەن تەڭ قۇقىققا يە بولعاننان كەيىن، جينالىس ۇستىندە «سوفيا» اتتى قۇلتەمىرگە ءسوز كەزەگى بەرىلدى. ول: «مەن وسى ءبىر ەركىندىك پەن قۇقىققا يە بولعان ەڭ العاشقى «ازامات» بولعانىم ءۇشىن شەكسىز قۋانىشتىمىن، ءارى ءوزىمدى باقىتتى سەزىنۋدەمىن. بۇل تاريحي ءسات سانالادى، مەن ماقتانا الامىن»، – دەدى.

سوفيا ءوزىنىڭ "ازاماتتىق" پىكىرىن ءبىلدىردى. فوتو: The Express Tribune.

بۇل تۋرالى ساۋد ارابياسىنىڭ مادەنيەت مينيسترلىگى تۆيتتەر پاراقشاسىندا وسى حاباردى راستاي وتىرىپ، «ساۋ ارابيالىق  ەڭ جاڭا ازامات سوفيانى قارسى الايىق!» دەپ جازادى.

ادامعا ۇقساتىلىپ جاسالعان «سوفيا» اقش-تىڭ ايگىلى «حانسون» كومپانياسىنىڭ ءونىمى.

وسىدان كەيىن، اقش-تىق تانىمال ءجۋرناليستى  ەندريۋ روسس سوركين «سوفيامەن» سۇحبات جاسادى. «سوفيا» ادامزاتقا اندرويد تەحنيكاسىنان كەلەتىن قاتەرلەر تۋرالى ءسوز ەتىپ، ونى جاساپ شىعارۋشىلاردى «قالجىڭمەن» قاعىتتى.  كينوداعى روبوتتار تۋرالى كۇلە وتىرىپ اڭگىمە ايتىپ، «گولليۆۋدتى» مازاق ەتتى.

“The Qazaq Times”