فوتو: akorda.kz

قر پرەزيدەنتى نۇرسىلتان نازارباەۆ لاتىن قارپىنە نەگىزدەلگەن قازاق ءالىپبيىنىڭ ۇسىنىلعان جوباسىن بەكىتۋ تۋرالى جارلىق شىعارۋ قاجەت ەكەنىن ايتتى. ول بۇل تۋرالى پرەزيدەنت اكىمشىلىگىنىڭ باسشىسى ادىلبەك جاقسىبەكوۆ پەن پرەزيدەنت اكىمشىلىگى باسشىسىنىڭ ءبىرىنشى ورىنباسارى مارات ءتاجيندى قابىلداۋ كەزىندە ايتتى، دەپ حابارلادى اقوردانىڭ ءباسپاسوز قىزمەتى.

كەزدەسۋدە نۇرسۇلتان نازارباەۆ لاتىن قارپىنە نەگىزدەلگەن قازاق ءالىپبيىنىڭ سوڭعى جوباسى قىزۋ تالقىلانىپ، قوعام تاراپىنان قولداۋ تاپقانىن اتاپ ءوتتى.

"لاتىن قارپىنە نەگىزدەلگەن قازاق ءالىپبيىنىڭ ۇسىنىلعان جوباسىن بەكىتۋ تۋرالى جارلىق شىعارۋ قاجەت. كوميسسيا جۇمىسىن اياقتادى. سوڭعى نۇسقا جاريالاندى. عالىمدار، ءتىلتانۋشىلار، ساياساتكەرلەر، جاستار جانە قازاقستان حالقى اسسامبلەياسىنىڭ وكىلدەرى ورتاق مامىلەگە كەلدى. جالپى، قوعام قولداپ وتىر" – دەدى قازاقستان پرەزيدەنتى.

مەملەكەت باسشىسى قازاق ءالىپبيىن لاتىن قارپىنە كەزەڭ-كەزەڭمەن جانە جۇيەلى تۇردە كوشىرۋدىڭ ماڭىزىنا نازار اۋداردى.

سوڭعى رەت ۇسىنىلعان لاتىن ءالىپبيى. فوتو: akorda.kz

ايتا كەتەيىك، سوڭعى رەت ۇسىنىلعان ءالىپبي بويىنشا قازاق تىلىنە ءتان داۋىستى دىبىستار اپوستروفپەن بەلگىلەنەدى. ال بۇل الداعى ۋاقىتتا ىسكەرلىك قۇجاتتاردى جاساۋدا جانە ءموبيلدى تەلەفون قولدانۋشىلار ءۇشىن قيىندىقتار تۋعىزادى.

“The Qazaq Times”