دەنيس حيساموۆ.

«يسلام مەملەكەتى» لاڭكەستىك ۇيىمىنىڭ قۇرامىندا تاجىكستان تولقۇجاتىمەن سوعىسىپ كەلگەن رەسەي قارۋلى كۇشتەرىنىڭ كاپيتانى تاجىكستانعا ەكستراديتسيالاندى – دەپ حابارلايدى تاجىكستان قورعانىس مينيسترلىگى.

قازان ايىنىڭ 20-سى كۇنى تۇركيا قۇقىق قورعاۋ ورگاندارىنىڭ قىزمەتكەرلەرى دۋشانبە قالاسىنا رەسەي قارۋلى كۇشتەرىنىڭ كاپيتانى، عالىم، «يسلام مەملەكەتى» تەررورلىق ۇيىمىنىڭ قاتارىندا بولعان ازاماتتى ەكستراديتسيالاعان. تۇركيادان تاجىكستانعا ەكستراديتسيالانعان 1983 جىلى 18 جەلتوقسان كۇنى رف كراسنودار قالاسىندا دۇنيەگە كەلگەن دەنيس حيساموۆ ەسىمدى ازامات. ونىڭ رەسەيگە ەمەس تاجىكستانعا ەكستراديتسيالانۋىن رەسمي انكارا ۇستالۋ بارىسىندا حيساموۆتان تاجىكستان تولقۇجاتىنىڭ تابىلۋىمەن بايلانىستىرعان.

تاجىكستان ىشكى ىستەر مينيسترلىگى ءباسپاسوز قىزمەتىنىڭ باسشىسى ۋمارجون ەموماليدىڭ سوزىنشە، حيساموۆ كوپ ۇزاماي تاجىكستاننان رەسەيگە ەكستراديتسيالاناتىن بولادى. جەرگىلىكتى باق وكىلدەرىنىڭ مالىمەتىنشە، بۇعان دەيىندە «يسلام مەملەكەتى» لاڭكەستىك ۇيىمىنىڭ قاتارىندا تاجىكستان تولقۇجاتىمەن سوعىسىپ جۇرگەن ازاماتتار ۇستالعان. وتكەن جىلى بىشكەك قالاسىنداعى قىتاي ەلشىلىگى مەن ستامبۇل قالاسىنداعى تۇنگى كلۋبتاردىڭ بىرىنە لاڭكەستىك شابۋىل جاساعان تەرروريستەردەن دە تاجىكستان تولقۇجاتتارى تابىلعان. تاجىكستان قۇزىرلى ورگاندارىنىڭ حابارلاۋىنشا، قازىرگى تاڭدا الەم بويىنشا 1100-دەن استام تاجىك ازاماتى تەررورلىق ۇيىمداردىڭ قاتارىندا سوعىسىپ ءجۇر.

“The Qazaq Times”