فوتو: REUTERS

ەۋروپا كەڭەسىنىڭ توراعاسى دونالد تۋسك ەۋروپا وداعى يسپانيانىڭ كاتالونيا اۆتونوميالىق ايماعىنداعى جاعدايدى رەتتەۋگە ارالاسا المايتىنىن مالىمدەدى. بريۋسسەلدە وتكەن ەو سامميتىندە تۋسك ەو-نىڭ ءتىپتى مادريد پەن بارسەلونا اراسىندا اراعايىن دا بولۋ مۇمكىندىگى دە جوعىن ايتتى، دەپ حابارلايدى centralasian.org اقپارات اگەنتتىگى. 

19 قازاندا يسپانيا ۇكىمەتى ەل كونستيتۋتسياسىنىڭ 155-بابىنا سۇيەنىپ، كاتالونيانىڭ اۆتونوميا مارتەبەسىن توقتاتۋعا جانە ايماقتى تىكەلەي باسقارۋ جۇيەسىن ورناتۋعا دايىن ەكەنىن بىلدىرگەن. 19 قازاندا ءمادريدتىڭ كاتالونيا بيلىگىنە تاۋەلسىزدىك ماسەلەسى بويىنشا شەشىم قابىلداۋعا بەرگەن مۇرساتى اياقتالعان.

1 قازاندا وتكەن رەفەرەندۋمدا كاتالونيا سايلاۋشىلارى يسپانيادان ءبولىنۋدى قولداپ داۋىس بەرگەن سوڭ پۋدجەمونت ايماق يسپانيادان ءبولىنۋ قۇقىعىنا يە بولعانىن مالىمدەپ، تاۋەلسىزدىك دەكلاراتسياسىن قابىلداعان. بىراق ول دەكلاراتسيانى جاريالاماي، اۋەلى مادريدپەن كەلىسسوز وتكىزۋگە شاقىرعان.

رەفەرەندۋمعا كاتالونيا سايلاۋشىلارىنىڭ 43 پايىزعا جۋىعى قاتىستى. ايماق بيلىگى داۋىس بەرگەندەردىڭ 90 پايىزى تاۋەلسىزدىكتى قولداعانىن ايتىپ، ناتيجەسىن زاڭدى دەپ جاريالادى. مادريدتەگى ورتالىق بيلىك رەفەرەندۋمدى زاڭسىز دەپ تاپتى.

“The Qazaq Times”