فوتو: ريا نوۆوستي ۋكراينا

گرۋزيانىڭ بۇرىنعى پرەزيدەنتى، ودەسسا وبلىسىنىڭ ەكس-گۋبەرناتورى ميحايل سااكاشۆيلي ۋكراينا پرەزيدەنتى پەتر پوروشەنكوعا ۋلتيماتۋم قويدى – دەپ حابارلايدى Oxu.az اقپارات كوزى.

ميحايل سااكاشۆيلي «ۋكراينسكايا پراۆدا» ينتەرنەت-گازەتىنە جاريالاعان ماقالاسىندا پەتر پوروشەنكوعا ءتورت بىردەي تالاپ قويعان. ول وندا  پەتر پوروشەنكوعا ۋكراينادا قىسقا ۋاقىت ارالىعىندا جەمقورلىقپەن كۇرەسۋگە، جاڭا سايلاۋ زاڭىن قابىلداۋعا، تۇرعىن-ءۇي كوممۋنالدى قىزمەتى ءتاريفىن ارزانداتۋعا جانە بيزنەسىن ساتۋعا كەڭەس بەرگەن. سااكاشۆيليدىڭ سوزىنشە، ەل بيلىگى بۇلاي ىستەمەگەن جاعدايدا ۋكراينا كوپ ۇزاماي الەۋمەتتىك-ەكونوميكالىق قۇردىمعا كەتەدى. ال ول ءوز كەزەگىندە ەلدى باسقارۋسىز الەۋمەتتىك توڭكەرىسكە الىپ كەلۋى مۇمكىن.

ەستەرىڭىزگە سالايىق، ميحايل سااكاشۆيلي وسى ۋاقىتقا دەيىن ۋكراينانى ارالاپ، حالىقپەن كەزدەسىپ، ولاردىڭ تالاپ-تىلەكتەرىن تىڭداعان بولاتىن. سااكاشۆيلي ءوزىن پەتر پوروشەنكو ۋكراينا ازاماتتىعىنان شىعارىپ تاستاعانان كەيىن اقش پەن پولشادا بولعان. ال ۋكرايناعا قىركۇيەك ايىنىڭ 10-ى كۇنى كەلگەن.

“The Qazaq Times”