قر پرەزيدەنتى نۇرسۇلتان نازارباەۆ جۇكتەلگەن مىندەتتەردى تيىسىنشە ورىنداماعانى ءۇشىن  ەنەرگەتيكا ءمينيسترى قانات بوزىمباەۆقا سوگىس جاريالادى. بۇل تۋرالى اقوردانىڭ رەسمي سايتىندا حابارلاندى.

"مەملەكەت باسشىسىنىڭ وكىمىمەن قازاقستان رەسپۋبليكاسى پرەمەر-ءمينيسترىنىڭ ۇسىنىمى نەگىزىندە جانار-جاعارماي ماتەريالدارىنىڭ ىشكى نارىعىنا ءتيىستى باقىلاۋدى قامتاماسىز ەتپەۋ تۇرىندە كورىنىس تاپقان جۇكتەلگەن مىندەتتەردى تيىسىنشە ورىنداماعانى ءۇشىن قازاقستان رەسپۋبليكاسىنىڭ ەنەرگەتيكا ءمينيسترى قانات الدابەرگەنۇلى بوزىمباەۆقا سوگىس جاريالاندى", - دەلىنگەن حابارلامادا.

ايتا كەتەيىك، كەشە ۇكىمەت وتىرىسىندا قر پرەمەر ءمينيسترى باقىتجان ساعىنتاەۆ بەنزين تاپشىلىعى بولۋىنا بايلانىستى قر ەنەرگەتيكا ۆيتسە-ءمينيسترى اسەت ماعاۋوۆتى ورنىنان بوساتىپ، مينيستر قانات بوزىمباەۆعا سوگىس جاريالاۋ تۋرالى پرەزيدەنتكە ۇسىنىس جاسالاتىنىن ايتقان.

“The Qazaq Times”