رەسەي حاكەرلەرى اقش-قا ەكستراديتسيالانۋى مۇمكىن

ەۋروپا اۋماعىندا ۇستالعان ەكى بىردەي رەسەيلىك حاكەر اقش-قا ەكستراديتسيالانۋى مۇمكىن – دەپ حابارلايدى «گولوس امەريكي» اقپارات اگەنتتىگى.

قازان ايىنىڭ 3-ءى كۇنى يسپانيا جوعارى سوتى رەسەي ازاماتى پەتر لەۆاشوۆتى اقش-قا ەكستراديتسيالاۋعا كەلىسىم بەرگەن. اقش-تا لەۆاشوۆقا «Kelihos» ۆيرۋسىن جاساۋ ارقىلى بانك شوتتارىن بۇزدى جانە كومپيۋتەر باعدارلامالارىنا شابۋىل جاسادى» دەگەن ايىپتار تاعىلعان. امەريكالىق قۇقىق قورعاۋ ورگاندارىنىڭ مالىمەتىنشە، پەتر لەۆاشوۆ ءوزىنىڭ «Kelihos» ۆيرۋسى ارقىلى الەم بويىنشا 100 مىڭنان استام كومپيۋتەردى ءبىر ارناعا توعىستىرىپ، ولاردى باسقارعان. ول وسى ىستەرى ءۇشىن اقش زاڭىنا سايكەس 50 جىلعا دەيىن باس بوستاندىعىنان ايىرىلۋى مۇمكىن.

اقش-پەن قاتار يسپانيا بيلىگىنە لەۆاشوۆتى ەكستراديتسيالاۋعا بايلانىستى ءوتىنىشتى رەسەي دە جىبەرگەن. الايدا پەتر لەۆاشوۆ وتكەن اپتادا ءوزىنىڭ رەسەيدىڭ ارنايى قىزمەتىنىڭ وفيتسەرى ەكەنىن، 10 جىل بويى «ەدينايا روسسيا» پارتياسىنا ەلدەگى وپپوزيتسيزيالىق ساياساتكەرلەرگە بايلانىستى اقپارات جيناپ كەلگەندىگى جايىندا مالىمدەگەن. وسىدان كەيىن يسپانيا سوتى رەسەي تاراپىنىڭ ءوتىنىشىن قاراۋسىز قالدىرعان. بۇدان بولەك لەۆاشوۆ يسپانيا سوتىنا ەگەردە ونى اقش-قا ەكستارديتسيالايتىن بولسا، وندا ول جەردە وعان امەريكا بيلىگى قىسىم كورسەتۋى مۇمكىن ەكەنىن دە ايتقان. بىراق سوت ونىڭ بۇل سوزدەرىن نەگىزسىز دەپ، لەۆاشوۆتى اقش-قا ەكستراديتسيالاۋعا كەلىسىم بەرگەن.

ال قازان ايىنىڭ 4-ءى كۇنى گرەكيا بيلىگى تاعى ءبىر رەسەيلىك حاكەر الەكساندر ۆيننيكتى اقش-قا ەكستراديتسيالاۋى مۇمكىن ەكەندىگى جايىندا اقپارات تاراتقان. ۆيننيككە اقش بيلىگى كيبەرالاياقتىق ارقىلى 4 ميلليارد دوللار كولەمىندە كريپتوۆاليۋتا جىمقىردى دەگەن ايىپ تاققان. بىراق ول تەرگەۋ بارىسىندا ءوزىن حاكەر ەمەس، قاراپايىم بيرجا قىزمەتكەرىمىن دەگەن. ەگەر گرەكيا سوتى ۆيننيكتى اقش-قا ەكستراديتسيالاۋعا رۇقسات بەرەتىن بولسا، وندا بۇل جەردە دە رەسەيدىڭ ءوتىنىشى قاراۋسىز قالاتىن بولادى.

“The Qazaq Times”