دونالد ترامپ «اقش داۋىلدان كەيىن پۋەرتو-ريكوعا كومەك قولىن سوزبادى» دەگەن سىندى جوققا شىعاردى

اقش پرەزيدەنتى دونالد ترامپ ەكى اپتا بۇرىنعى داۋىلدان وراسان زور شىعىنعا ۇشىراعان پۋەرتو-ريكو "امەريكانىڭ نازارىنان تىس قالدى" "دەگەن سىني مالىمدەمەلەردى جوققا شىعاردى. مەملەكەت باسشىسىنىڭ ارالعا جوسپارلانعان ساپارىنان  اقش-تىڭ فەدەرالدى كومەگى ەرتە جەتكەنىن حابارلاعان پۋەرتو-ريكونىڭ گۋبەرناتورى ريكاردو روسسەلو جاقىن كۇندەرى 1,5 ملن باررەل جانارماي بەرىلەتىنى تۋرالى حابارمەن ءبولىستى. بۇل تۋرالى ۆۆس اقپاراتتىق اگەنتتىگى جازدى. 

گۋبەرناتوردىڭ ايتۋىنشا، قازىر ارالدى قايتا قالپىنا كەلتىرۋ جۇمىستارىنا 10 مىڭ ادام تارتىلىپ،  حالىقتىڭ تەڭ جارتىسى اۋىز سۋمەن قامتاماسىز ەتىلگەن. جەرگىلىكتى بيلىك وكىلىنىڭ رەسمي دەرەكتەرى الداعى ەكى اپتادا تۇرعىن ۇيلەردىڭ 10 پايىزى، ال كەلەسى ايدا پۋەرتو-ريكو حالقىنىڭ تورتتەن ءبىرى ەلەكتر جارىعىنا قول جەتكىزە الادى. سۋ قۇبىرلارى قايتا ىسكە قوسىلعان 46 پايىز حالىقتىڭ ۇلەسى اپتا سوڭىنا قاراي 60 پايىزعا جەتەدى. سونداي-اق، ءموبيلدى بايلانىس قولدانۋشىلارىنىڭ 40 پايىزى تەلەفون جەلىلەرىن قايتا پايدالانۋعا مۇمكىندىك الادى.

داۋىل كەسىرىنەن ىسكە جارامسىز بولىپ قالعان جولدارمەن پۋەرتو-ريكونىڭ 8 مىڭعا جۋىق حالىق تۇراتىن، ورتالىقتان شالعاي 140 ەلدى مەكەنىنە اس-سۋ، مەديتسينالىق كومەك پەن وزگە دە جابدىقتاردى جەتكىزۋ قيىنعا سوعىپ وتىر.

پۋەرتو-ريكو - وزىندىك باسقارۋ جۇيەسى بار، اقش-تىڭ تىكەلەي تەرريتوريالىق يەلىگى بولماسا دا، جوعارعى بيلىگى كونگرەسسكە قارايتىن، كاريب تەڭىزىندەگى ارال.

“The Qazaq Times”