شاعىن بيزنەستىڭ تابىسى ارتتى

2017 جىلدىڭ ءبىرىنشى جارتى جىلدىعى بويىنشا قازاقستانداعى شاعىن بيزنەس تابىسى رەكوردتىق  سوماعا جەتتى. سالىق تولەنگەنگە دەيىن تابىس 981,6 ملرد تەڭگە بولعان. بۇل 2016 جىلدىڭ قاڭتار-ماۋسىمداعى جالپى تابىس كولەمىنەن 29,6%-عا جوعارى.

Finprom.kz ساراپتاما اگەنتتىگىنىڭ مالىمەتىنشە، ەل ەكونوميكاسى بىردەن السىرەپ كەتپەسە، شاعىن بيزنەستىڭ تابىسى 2016 جىلعىدان دا كوپ بولۋى مۇمكىن. بىلتىر كورپوراتيۆتى تابىس سالىعى تولەنگەنگە دەيىن كاسىپكەرلەردىڭ تازا كورسەتكىش 1,9 ترلن تەڭگەنى قۇراعان جانە بۇل سوما سوڭعى بەس جىلداعى ەڭ جوعارعى كورسەتكىش بولعان.

تابىسى كوبەيگەن سەكتورلاردىڭ ءبىرى - تاۋ كەن ىسىمەن اينالىسىپ جۇرگەن شاعىن كاسىپورىندار. ولار 159,3 ملرد تەڭگە تابىس تاپقان. بولشەك جانە كوتەرمە ساۋدانىڭ تابىسى - 141,6 ملرد تەڭگە.

2017 جىلدىڭ 6 ايى بويىنشا شاعىن كاسىپورىنداردىڭ جالپى كىرىسى 11,6 ترلن تەڭگەنى قۇرادى. بۇل وتكەن جىلعا قاراعاندا 29,3%-عا كوپ. اگەنتتىكتىڭ اقپاراتىنشا، 2010-2015 جىلدار ارالىعىندا شاعىن بيزنەستەگى ءتۇسىم 6 ترلن تەڭگەدەن اسپاعان، ال وتكەن جىلى كىرىستىڭ بىردەن ءوسىپ كەتۋى ينفلياتسيامەن بايلانىستى.

ەسكەرەتىن جايت، ينفلياتسيا شاعىن بيزنەس شىعىندارىنىڭ كوبەيۋىنە دە اسەر ەتىپ وتىر. وسى جىلى كىشىگىرىم بيزنەس وكىلدەرىنىڭ شىعىنى 10,6 ترلن تەڭگەگە باعالانىپ وتىر جانە وتكەن جىلمەن سالىستىرعاندا 29,3%-عا جوعارى. الايدا كىرىستىڭ ءبىراز جوعارى بولۋىنا بايلانىستى شاعىن سەكتور وڭ ناتيجە كورسەتە الدى.

سونىمەن بيىلعى جىلى  كىرىسى بارىنشا وسكەن شاعىن بيزسەس سالالارىنىڭ ءبىرى - سۋ شارۋاشىلىعى كاسىپورىندارى (2,2 ەسەگە وسكەن), باسقا قىزمەتتەردىكى 83% -عا، قۇرىلىستىكى 60% -عا ۇلعايعان.

دەگەنمەن اگەنتتىكتىڭ مالىمەتتەرىنە سۇيەنسەك، 2 توقساننىڭ ناتيجەسى بويىنشا، قازاقستاندا كاسىپكەرلەردىڭ بەلسەندىلىگى تومەندەپ كەتكەن. ءوزىن جۇمىسپەن قامتىعان ادامدار سانى 200 مىڭعا قىسقارعان.

“The Qazaq Times”