دانيار اقىشەۆ تەڭگە كۋرسىنا قاتىستى بولجامىن ايتتى

ۇلتتىق بانك توراعاسى دانيار اقىشەۆ فۋندامەنتالدى وڭ فاكتورلارعا قاراماستان، ۆاليۋتا نارىعىندا قۇبىلۋ پروتسەسى جالعاسىپ جاتقانىن ايتتى. سونداي-اق، ول تەڭگە كۋرسىنا قاتىستى بولجام جاسادى، دەپ حابارلايدى باس بانكتىڭ ءباسپاسوز قىزمەتى.

قازاقستاندىق باسىلىمدار جانە تەلەۆيدەنيەلەردىڭ باس رەداكتورلارىمەن كەزدەسۋى بارىسىندا اقىشەۆ "دەۆالۆاتسيا بولجامىنا بايلانىستى شەتەل ۆاليۋتاسىنا دەگەن سۇرانىستىڭ تىم كوپ بولۋى دوللار كۋرسىنىڭ 337 تەڭگەگە دەيىن جوعارىلاپ كەتۋىنە اسەر ەتكەنىن" ايتتى (19 قىركۇيەك كۇنگى كۇندىزگى سەسسيا كەزىندە 1 دوللار 341,12 تەڭگەگە دەيىن نىعايدى، ايىرباستاۋ پۋنكتەرىندە دوللار 343 تەڭگەدەن ساتىلۋدا-رەد.).

"ۇلتتىق بانكتىڭ بولجامى بويىنشا، اقش دوللارىنا قاتىسى تەڭگە كۋرسى مۇناي باعاسى 50 دوللاردان تۇسپەگەن جاعدايدا وسى دەڭگەيدە ساقتالادى. ال دوللارعا قاتىستى رۋبل باعامى 59-60 رۋبلدەن اسپايدى", - دەدى ۇلتتىق بانك توراعاسى.

ايتا كەتەيىك، Brent ماركالى مۇناي باعاسى استانا ۋاقىتىمەن 16:50-دە باررەلىنە 55,8 دوللاردى قۇرادى.

بۇدان بولەك باس بانكير ەلدەگى التىن ۆاليۋتالى رەزەرۆتەردىڭ جوعارىلاعانىن اتاپ ءوتتى.

"الدىن الا جاسالعان مالىمەتتەر بويىنشا 8 ايداعى ءوسىم 11,6 پايىزدى قۇراپ، 32 ملرد دوللارعا دەيىن جەتتى. 58 ملرد دوللار كولەمىندەگى ۇلتتىق قور قارجىسىن قوسا ەسەپتەگەندە ەلدىڭ جالپى حالىقارالىق رەزەرۆى 91 ملرد دوللارعا جەتتى نەمەسە جالپى ىشكى ءونىمنىڭ 61 پايىزىن قۇرايدى", - دەدى ول.

“The Qazaq Times”